Португалиялик ҳужумчи Криштиану Роналду фаолиятидаги голлари сонини 982 тага етказди. 41 ёшли футболчи Саудия Арабистони чемпионатининг навбатдаги учрашувида ҳам рақиб дарвозасини ишғол қилди.

Роналду тўп сураётган «Ан-Наср» сафарда «Ал-Файсалий» жамоасини 3:1 ҳисобида мағлубиятга учратди. Меҳмонларнинг голларидан бири айнан португалиялик юлдуз ҳисобига ёзилди.

Учрашувдан кейин Роналду ижтимоий тармоқдаги саҳифасида ўйиндан олинган бир нечта суратни эълон қилди. Қизиғи, у мазкур суратларга атиги битта сўздан иборат изоҳ қолдирди.

«Олға!» — деб ёзди португалиялик футболчи.

Шу тариқа, Роналду фаолияти давомида 1000 та гол уришдек тарихий маррага яна бир қадам яқинлашди. Ҳозирда унга ушбу натижага эришиш учун яна 18 та гол керак.

«Ан-Наср» эса ғалабадан кейин Саудия Арабистони Про-лигаси турнир жадвалида пешқадамлик учун курашни давом эттирмоқда.

Айни пайтда «Ан-Наср» ва «Ал-Қодисия» 25 очкодан жамғариб, биринчи ўринни бўлишиб турибди.

Бироқ 24 очкога эга «Ал-Ҳилол»да мазкур икки жамоадан ўзиб кетиш имконияти бор. Чунки ушбу клуб рақибларига нисбатан битта кам ўйин ўтказган.