Kecha «Jenerali» (Generali Stadium) stadionining loyihasi taqdim etildi. Ushbu yangi sport majmuasida «Milan» va «Inter» klublari o‘z uy uchrashuvlarini o‘tkazadi. Stadionga bunday nom berilishiga sabab — Italiyaning mashhur sug‘urta kompaniyasi uning nomidan foydalanish huquqini sotib olgan. Bu kelishuv har ikki klubga ham katta daromad keltirishi kutilmoqda.
Biroq stadionning yangi nomi hammaga ham ma’qul kelgani yo‘q. Unga qarshi fikr bildirganlar orasida «Milan»ning sobiq sardori Janni Rivera ham bor.
«Hozirgi stadion juda chiroyli, unda hali ham futbol o‘ynash mumkin. Uni buzib, o‘rniga boshqasini qurishmoqchi. Ammo yangi stadion umuman qurilmasligi ham mumkin. Bunday qarorni qabul qilganlar uchun bu yanada yomon bo‘ladi. U “Jenerali Stadium” deb ataladi — eng ko‘p pul to‘lagan kompaniyaning nomi unga beriladi. Men esa stadionga o‘zimning va do‘stim Sandro Massolaning nomi qo‘yilishini istardim», — deya Riveraning so‘zlarini keltirmoqda derbyderbyderby.it.
