Кеча «Женерали» (Generali Stadium) стадионининг лойиҳаси тақдим этилди. Ушбу янги спорт мажмуасида «Милан» ва «Интер» клублари ўз уй учрашувларини ўтказади. Стадионга бундай ном берилишига сабаб — Италиянинг машҳур суғурта компанияси унинг номидан фойдаланиш ҳуқуқини сотиб олган. Бу келишув ҳар икки клубга ҳам катта даромад келтириши кутилмоқда.

Бироқ стадионнинг янги номи ҳаммага ҳам маъқул келгани йўқ. Унга қарши фикр билдирганлар орасида «Милан»нинг собиқ сардори Жанни Ривера ҳам бор.

«Ҳозирги стадион жуда чиройли, унда ҳали ҳам футбол ўйнаш мумкин. Уни бузиб, ўрнига бошқасини қуришмоқчи. Аммо янги стадион умуман қурилмаслиги ҳам мумкин. Бундай қарорни қабул қилганлар учун бу янада ёмон бўлади. У “Женерали Стадиум” деб аталади — энг кўп пул тўлаган компаниянинг номи унга берилади. Мен эса стадионга ўзимнинг ва дўстим Сандро Маццоланинг номи қўйилишини истардим», — дея Риверанинг сўзларини келтирмоқда derbyderbyderby.it.