Turinning "Yuventus" klubi bosh murabbiyi Luchano Spalletti "Napoli"ga qarshi uchrashuvdagi g‘alabadan so‘ng o‘yin natijasi haqida fikr bildirdi.
"Futbolchilar muxlislarning ishonchini qozonishga intildilar: ular yakkakurashlarga kirishdi, jamoa uchun bor kuchlari bilan harakat qilishdi, bir lahza ham ikkilanishmadi va o‘yinda beparvolikka yo‘l qo‘yishmadi. G‘alaba haqli bo‘ldi va buning uchun jamoani maqtash kerak.
Agar futbolchilarning o‘zi shunday qadam tashlamasa, vaziyatni o‘zgartirish juda qiyin bo‘ladi. Agar kurashda yutqazib, yakkakurashlarda raqibga imkoniyatni boy bersangiz, hech qanday taktik sxema ish bermaydi.
Katta qiyinchiliklarga qaramay, biz juda muhim g‘alabaga erishdik. Bugun ixtiyorimizda atigi 13 nafar futbolchi bor edi", — deya Spallettining so‘zlarini keltirmoqda calcionapoli1926.it.
Spalletti o‘tgan yilning kuzida "Yuventus" bosh murabbiyi etib tayinlangan edi.
