Кириш Регистрация

Блог

Шермуҳаммад Абдуғофуров

Forza Inter! «Интер Милан» клуби ҳақида таҳлилий-субъектив блог

Эрик Тоҳир "Интер"ни сотмоқчи

Баҳо:
+0; -0

Қарзлар узилгани йўқ, ҳаражат ошмоқда, даромаддан эса дарак йўқ. Агар “Интер” мавсум якунида “Чемпионлар лигаси”га чиқа олмаса, аҳвол янада оғирлашади. Гап фақат клуб турнирда қатнашгани учун оладиган 50 миллион евролик мукофот пулида эмас. “Чемпионлар лигаси”дан четда қолиш клубнинг нуфузига салбий таъсир этади. Бу эса янги ҳомийларни ҳам, кучли ўйинчиларни жалб қилишни ҳам янада қийинлаштиради. Хуллас, клуб кутилган натижаларни кўрсата олмаяпти, мухлислар норози...

Айтишларича, Эрик Тоҳирни бу савол ҳозирда анчагина ўйга толдирган. Баъзи манбалар индонезиялик тадбиркор январь ойида Американинг Goldman Sachs ширкатига клубнинг қийматини аниқлаш ва нафақат Массимо Мораттининг 29,5 фоизлик, балки, ўзининг 70 фоиз улушига ҳам ҳаридор топишга буюртма бергани ҳақида хабар бермоқда. Бу гапга ишонилса, Тоҳирнинг ҳафсали пир бўлган ва у клубни бутунлай сотмоқчи.

Тоҳир Массимо Мораттининг улушини сотиб клубга янги сармоядорларни жалб қилиш ниятида эди. Собиқ президент ҳам бунга қарши эмас эди. “Интер”га ортиқ сармоя киритмаётган Дон Массимо (бунгача Моратти ўзининг шахсий маблағлари ҳисобидан йилига 30 миллион евро миқдорида сармоя киритиб келаётган эди.) шу йўл билан бўлса ҳам клубга фойда келтириш ниятида эди. Энди эса, афтидан, Моратти ўз улушини сотиш фикридан қайтиб улгурган.

Ҳозирда “Интер” ишлатаётган пуллар қарзга олинган. Яъни, 2019 йилга бориб “Интер” 230 миллион евро атрофидаги қарзларини банкларга қайтариши керак. Клуб 2014 йилни -74 миллион, 2015 йилни эса – 40 миллионлик камомад билан якунлади. Даромаддан эса, аввал айтилганидек, ҳамон дарак йўқ.

Албатта, Тоҳир сўнгги икки йил ичида олиб борган ислоҳотлар клуб иқтисодий аҳволини анча яхшилади ва бу йил охирида УЕФАнинг молиявий фэйр-плэй қоидаларидан четга чиқмаса керак. Лекин, юқори натижалар ва даромадсиз клубни бошқариш тобора оғирлашиб бораверади. Тоҳир италиялик сармоядорларни жалб қилишга ҳам уриниб кўрди. Лекин, Тоҳир таклиф қилган кичик улушлар ҳеч кимни қизиқтира олмади. Шу кунгача Тоҳир ўзининг шахсий маблағлари ҳисобидан клубга бор-йўғи 75 миллион евро сарфлаган.

Хуллас, вазият чиндан ҳам анча мураккаб. Узоқ танаффусдан Миланга ташриф буюрадиган Эрик Тоҳир ўзининг яқин сафдошлари билан вазиятни муҳокама қилади. Лекин, ҳақиқат шуки, агар клуб “Чемпионлар лигаси”га чиқолмаса нафақат спорт, балки иқтисодий инқирозга юз тутади. Балки шунинг учун ҳам Тоҳир шунинг учун ҳам бундан буёғига боришни истамаётгандир. Эҳтимол у Жакартадан туриб “Интер”ни бошқариш яхши натижа бермаслигини тушунию етгандир...

Хуллас, кейинги икки ҳафта давомида вазиятни кузатишда давом этамиз. Клубга яқин манбалар хабар беришича, миш-мишларга қарамай Эрик Тоҳир клубни сотмайди.

Киритилган сана: 11.02.2016 11:44. Ўкилди: 22803 марта.

Фикр билдиринг

ФИКР БИЛДИРИШ УЧУН РЕГИСТРАЦИЯДАН УТИШ КЕРАК!

МУАЛЛИФНИНГ БОШҚА МАҚОЛАЛАРИ

 

БЛОГГЕРЛАР

Асосий сахифа
© STADION.UZ
Гувоҳнома №0917. Берилган санаси: 02.12.2013. Муассис: «OSIYO KABEL» МЧЖ. Бош муҳаррир: Бўронов Олимхўжа Азимхўжа ўғли. Таҳририят манзили: 100057, Тошкент шаҳри, Уста Ширин 125. E-mail: admin@stadion.uz
Барча ҳуқуқлар ҳимояланган. Сайт материалларидан тўлиқ ёки қисман фойдаланилганда веб-сайт манзили кўрсатилиши шарт.
Блогдаги материаллар учун блог эгаси, хабарлар остидаги фикрлар учун фойдаланувчининг ўзи жавобгар.


счётчик