ОФК лойиҳасига кўра, 2034-йилги Жаҳон чемпионати саралашининг асосий қисми Осиё Миллатлар лигаси билан боғланади.
2032/33-йилги Миллатлар лигасининг Tier-1 босқичида 18 та терма жамоа қатнашади. Ҳар бир жамоа лига босқичида жами 12 та учрашув — 6 та уйда ва 6 та сафарда ўтказади. Мусобақа 2032-йил март ойида бошланиб, 2033-йил мартида якунланади. 2032-йил сентябрь–октябрдаги ФИФА ойнасининг ўзида ҳар бир терма жамоа тўрттадан ўйин ўтказиши кўзда тутилган.
Лига босқичи якунида дастлабки 6 ўринни эгаллаган терма жамоалар ЖЧ-2034 йўлланмасини тўғридан-тўғри қўлга киритади. Саудия Арабистонида ўтадиган мундиал 2034-йилнинг охирги қисмига режалаштирилгани сабабли, йўлланмани эрта қўлга киритган жамоаларда тайёргарлик учун анча вақт бўлади.
7–10-ўринларни эгаллаган тўртта терма жамоа эса 2033-йил сентябрь–октябрь ойларида ЖЧ плей-оффида қатнашади. Қарама-қаршиликлар уй-сафар тизимида ўтказилади. Плей-офф якунида 2 та жамоа мундиалга тўғридан-тўғри чиқади, яна бир терма жамоа қитъалараро плей-офф йўлланмасини олади.
Миллатлар лигасининг ўзи эса давом этади. 2033-йил июнида чорак финал, ноябрда эса «Финал тўртлиги» ўтказилиши режалаштирилган. Ушбу учрашувлар ЖЧ йўлланмаларининг тақсимотига таъсир қилмайди.
Тақвимни шакллантиришда 18 жамоа 6 та саватга ажратилади. Ҳар бир терма жамоа ҳар бир саватдан иккитадан рақибга қарши — биттаси уйда, биттаси сафарда — ўйнайди. Шу тариқа, мумкин бўлган 17 рақибдан 12 таси билан учрашади.
Масалан, амалдаги ФИФА рейтинги асосида Ўзбекистон иккинчи саватда бўлса, биринчи саватдаги Япония, Эрон ва Австралиядан иккитасига қарши ўйнайди. Ўзбекистон жойлашган иккинчи саватдаги қолган икки жамоа — Жанубий Корея ва Саудия Арабистони билан ҳам учрашади. Худди шу тамойил учинчи саватдан олтинчи саватгача давом этади.
