Kun.uz: “Манчестер Сити” жамоаси сардори Венсан Компания Европа чемпионлар лигасининг 1/8 финалидаги мағлубиятдан кейин ўз фикрларини билдираркан, жамоаси учун “Барселона” жуда кучлилик қилишини таъкидлаб ўтди.

“Ҳақиқатни олиб гапириш керакки, бугунги кунда “Барселона” ва “Бавария”нинг бошқа жамоалар билан даражасида фарқ бор. “Сити”даги амбиция худди шундай даражага чиқиш бўлиб турибди. Бунинг учун жуда кўп меҳнат қилишимиз, узоқ жараённи босиб ўтишимиз керак. Албатта алоҳида ўйинларда уларни ютиш мумкин. Лекин бу ишни барқарор равишда амалга ошириш учун ҳали қиладиган ишларимиз кўп”, дейди бельгиялик ҳимоячи.

Унинг фикрича барча Англия жамоаларининг мусобақани тарк этишидан фожеа ясамаслик лозим. “Бунақаси бўлиб туради. Кейинги йил барча тўрттала жамоа ҳам ярим финалга чиқиши мумкин. Англияда чемпионат ўйинлари жуда мураккаб кечади. Бизнинг жамоалар Европада юқори савияда ўйнай олиш имкониятига эга. Бу йил шунчаки омадсиз йил бўлди”, дея футболчининг сўзларидан иқтибос келтиради L’Equipe нашри.