Kun.uz: Туркиянинг Самсун шаҳрида дзюдо бўйича навбатдаги Гран-при турнири ўз якунига етди. Сўнгги кун беллашувлари оғир вазнли спортчилар иштирокида кечиб, унда вакилларимизга бироз омад етишмади.

-90 килограмм вазн тоифасида Шерали Жўраев нисбатан ишончли иштирок этиб, дастлаб швециялик рақибини, сўнгра жазоирлик Абдураҳмон Бенамадини мусобақадан чиқариб юборди. Бирок чорак финал беллашувида голландиялик Ноэль ван Вантга имкониятни бой бериб қўйди. Жўраев шу тариқа бронза медали учун ўтиш баҳсида иштирок этди ва озарбайжонлик Турал Сафгулиевни доғда қолдирди. Бронза медали учун литвалик Каролис Бауза билан кечган беллашувда вакилимиз рақибидан устун келди. Айни шу вазндаги Давронбек Сатторов илк баҳсда швециялик рақибидан устун келиб, иккинчи даврада бразилиялик полвонга енгилди.

-100 килограммгача бўлган дзюдочилар орасида юртимиз шарафини ҳимоя қилган Рамзиддин Саидов иккинчи даврада исроиллик Петер Пальтчикка ҳеч қандай имконият қолдирмади. Бироқ грузиялик Александре Заашвили билан ўтган бел олишиш вакилимиз фойдасига ҳал бўлмади.

Мутлақ вазн тоифасида Болтабой Болтаев туркиялик Бурак Сербестни малубиятга учратишга эришди. Бироқ иккинчи жангда литвалик Мариус Паскевисиус тўсиғидан ўта олмади. Абдулло Тангриев эса биринчи баҳсдиёқ эстониялик Йохан Меттисга енгилди.