Замонавий футболнинг энг ёрқин юлдузларидан бири бўлган Златан Ибрагимовичнинг жиззаки табиати барчага маълум. Яқинда «ПСЖ» шарафини ҳимоя қилаётган швециялик ҳужумчи бисотидаги энг нордон иборалар билан франциялик ҳакамларни «меҳмон» қилди. Ҳатто ўзи тўп сураётган мамлакатни «мақташ»га ҳам журъат этди. Championat.сом сайти Ибранинг «қора дафтари»дан жой олган шахслар билан таништиришга қарор қилди.
Болаликдаги раҚиблар
«Мен кекчи эмасман. Шунчаки, ёмонликларни кечира олмайман. Хотирам эса жуда кучли» - Златан Ибрагимович айнан шу тоифадаги шахс. Ўзининг «Бу мен Златан» номли автобиографик асарида иззатталаб футболчи болаликдаги камситишларни ҳозир ҳам жуда яхши эслашини таъкидлаган. Ҳа, Швециянинг жанубий ҳудуди - Мальмё яқинида дунёга келган болакайнинг ёшлик йиллари анчайин оғир кечди. Унинг ота-онаси 70-йилларда дурустроқ тирикчилик илинжида Скандинавияга кўчиб келишганди. Отаси-Сефик соқчилик, онаси-Журка эса фаррошлик қилишган. Златан 2 ёшга тўлганида улар ажрашиб кетишди. Натижада бўлажак футбол юлдузи эътибордан четда қолди-фарзандларини боқиш ёлғиз ўзига қолган она кечаю-кундуз латта билан олишгани-олишган эди. Табиийки, ёш Ибрада отасига, қолаверса, ўзи сингари қашшоқ оилаларнинг фарзандлари намойиш этган адолатсизликларга нисбатан эътирозлар пайдо бўлди. Златан кўпинча оч-наҳор юрарди.
«Барселона»
Каталонияликлар таклифига розилик берганини Златан ҳозир ҳам афсус-надоматлар билан эслайди. Ўрни келиб қолганда, у «Барса»ни танқид қилишдан ҳам эринмайди. У ўзининг собиқ жамоадошларини «калтафаҳм ўқувчилар», жамоани эса «Болалар боғчаси» деб атаганди. Клубнинг собиқ президенти Сандро Россель швециялик футболчининг жамоага умуман мос тушмаганини очиқ-ойдин тан олганди: «Ибрагимович - «Барселона» тарихидаги энг омадсиз трансфер».
Хосеп Гвардиола
Златаннинг биринчи рақамли душмани - Хосеп Гвардиола. Ўзининг Каталониядаги омадсизлигини футболчи айнан шу мураббий билан боғлайди. «Унга илк марта дуч келганимда рисоладагидек кўринганди. Бироқ ўшанда катта хатога йўл қўйган эканман» - бу Ибранинг ўз устози хусусидаги энг беозор фикрлари. «Бир куни у менга тихирлик қила бошлади. Тез орада мен асабларимни жиловлай олмай қолдим. Ҳаёлимдан рўпарамдаги сочсиз бошини тинмай қашлаётган бу нусха менинг ашаддий душманим, деган фикр ўтди. Кейин унга сен эркак эмассан, дея бақирдим. Балки бундан ҳам қўполроқ ҳақорат қилгандирман. Ўша оқшом ҳақиқий телбага айланиб қолгандим. Унинг ўрнида бошқа одам бўлганида, тагини ҳўл қилиб қўйиши аниқ эди». Ҳа, Ибрагимович билан Гвардиола ўртасидаги «дўстона» муносабатлар хусусида алоҳида бир китоб ёзса бўлади. Собиқ устозини кулга белаш имконини берадиган арзимас сабаб ҳам ҳужумчининг эътиборидан четда қолмайди: «Гвардиола «Бавария»ни бошқаради, дейсизми? Бу-айнан қўрқоқнинг иши. У менинг фаолиятимдаги энг ношуд мураббий».
Лионель Месси
Аслида Ибра билан Хосеп ўртасидаги низо Месси туфайли юзага келганди. «Барса» таркиби билан дурустроқ танишиб улгурмасдан, Златан ўта сермаҳсул ўйин кўрсата бошлади. Табиийки, бу аргентиналик ёш юлдузга ёқмади - Месси мураббийдан уни қанотдан марказга ўтказишни илтимос қилди. Оқибатда Златанга узатиладиган тўплар сони камайиб, маҳсулдорлик камайиб кетди. «Месси 4та «Олтинтўп»ни қўлга киритган, шу сабабли сендан устунроқ, демоқчимисиз? Нима ҳам дердим, бу-ўта жиддий факт. Аммо мен автоматдан конфет харид қилиш учун унга ўхшаб курсидан фойдаланмайман!»-дейди Ибра ҳазил аралаш. Лекин шу билан бирга, Златан аргентиналик касбдошининг маҳоратига муносиб баҳо беради. Фақат Мессининг инжиқ табиати ва худбинлиги унинг ғашини келтиради. Дарвоқе унинг ўзи ҳам шу тоифадан!.
Марио Балотелли
Бир қатор умумий салбий жиҳатларга эга бўлган бу 2 ҳужумчи битта агент билан ҳамкорлик қилишади, «Интер»да ёнма-ён туп суришган. Шунга қарамасдан, Златан Мариони ёқтирмайди. «Балотелли, «Реал»га ўтиши мумкинми, деб сўраяпсизми? Менимча, йўқ. Унга «Барселона» кўпроқ мос келади - ўртамиёна ҳужумчига ўртамиёна жамоа. Бир сафар Марио мен сендан зўрроқман, дея даъво қилди. Мен уни ҳазиллашяптими, деб ўйловдим. Маълум бўлишича, у чиндан ҳам шундай фикрда экан... Дарвоқе, худди Марио сингари мен ҳам мушакбозликни яхши кўраман. Лекин ҳеч қачон ўз уйимни ёқиб юборган эмасман» - Ибранинг Балотелли ҳақидаги заҳарханда ҳазили ана шундай.
«А» серияси
«У ерда мен ДХҚга, бу ерда эса МРБга қаршиман» - Леонид Гайдайнинг машҳур фильмидан олинган ибора қаҳрамонимизнинг ўзи тўп сурган чемпионатларга берган шарҳига жуда мос тушади. «Барселона»га ўтганидан кейин Ибра «А» сериясига тош ота бошлади: «Испания чемпионатидан фарқли ўлароқ, «А» сериясида сиёсий руҳ жуда кучли. Масалан, биз «Ювентус» таркибида чемпион бўлганимизда, Италия матбуотининг бир қисми даҳо даражасига кўтариб қўйди. Бошқаси эса «кулга белаб, косовга санчди». «Интер» билан шоҳсупага кўтарилганимда эса, бунинг тескариси юз берди... Ана шу разил сиёсий руҳнинг футболга умуман кераги йўқ». Шунингдек, Златан Италия чемпионатининг томошабинбоп эмаслигини ҳам жиддий танқид қилганди.
Парижлик мухлислар
Одатда Златан мухлислар билан доимо яхши муносабатда бўлади. Фақат Париж бундан мустасно. Ҳакамлар ва бу «бедаво мамлакат»га ўз эътирозини билдиришдан аввал, у пойтахтлик мухлислардан ҳафсаласи пир бўлганлигини эътироф этганди. Ибранинг фикрича, улар ўз жамоаларини ҳуштакбозлик билан қарши олар эканлар. Жумладан, «Ренн»га қарши кечган ўйинда айнан шунақа ҳодиса кузатилган. «Менинг бошим қотиб қолди. Ишқибозларнинг нима учун ҳуштак чалишларини сира тушунолмаяпман. Уларнинг мақсадлари нима? Мағлубиятга учрасак ҳам ҳуштак чаладилар, ғалаба қозонганимизда ҳам. Нима бало, биз клубга келгунимизга қадар улар роса икрахўрлик қилишганми, дейман?» - дейди Ибра ҳайрон бўлиб.
Журналистлар
Гарчи Златан матбуот вакиллари билан мулоқот қилишга қарши бўлса-да, вақти-вақти билан уларни ҳам «чақиб» туради. Айниқса, инглиз журналистларини. Чунки у ўзи ҳақидаги салбий фикрларни яхши эслаб қолади, унутмайди. Бир пайтлар Британия матбуоти швециялик ҳужумчи инглиз клублари дарвозасига гол ура олмаслиги ҳақида хабар берганди. Вақти келиб, Златан Англия терма жамоаси дарвозасини ишғол этди ва аччиқ киноя билан англиялик шарҳловчига юзланди: «Хўш, бу ёғига нима дейсиз? Яна мен ҳақимда қандайдир бўлмағур уйдирмаларни ёзасизми? Мен шаънимга ярашмайдиган бемаъни фикрларга чидай олмайман. Менга туҳмат қиладиган журналистларни ёмон кўраман» - дейди футболчи матбуот вакиллари ҳақида.
Франция ва франциялик ҳакамлар
Франция биринчи дивизиони 2нинг 29-туридан ўрин олган «Бордо»-«ПСЖ» (3:2) учрашувидан кейин Ибрагимович учрашув ҳакамларига заҳрини сочди. Шунингдек, фаолият юритаётган мамлакат ҳам унинг қаҳр-ғазабидан бенасиб қолмади: «15 йилдан бери тўп сураётган бўлсам, бунчалик сифатсиз ҳакамликка дуч келган эмасман. Бунчалик бедаво мамлакатга ҳам. «ПСЖ»дек номдор жамоани ўз чемпионатига ҳам жалб этишга у муносиб эмас» - ўйиндан кейин ечиниш хонасига йўл олган ҳужумчининг мазкур эътирофини Canaldan вакиллари тасвирга тушириб, бутун мамлакатга намойиш этишди. Табиийки, Франция жамоатчилиги Ибранинг сўзларидан ларзага келди. Охир-оқибат, можаро сиёсий доираларга ҳам етиб борди. Жиззаки футболчи узр сўради: «Шуни таъкидламоқчиманки, менинг сўзларим Франция ва унинг фуқароларига эмас, балки футболга, фақат футболга тааллуқли эди» - деди Златан. Шу тариқа «бедаво» отлиқ «фахрли унвон» фақатгина француз футболига бағишлангани ойдинлашди.
Манба: Championat.com
Содиқ СОБИР тайёрлади
