Спорт арбитраж суди бугун "Ал-Ҳилол" футболчиси Носир аш-Шамроний масаласи бўйича ўз қарорини эълон қилди. Қарорга кўра, ҳужумчининг дисквалификацияси битта шарт билан 2та ўйинга камайтирилди. Энди Шамроний 8та эмас, 6та ўйинда майдонга туша олмайди ва 2 йил давомида синов муддатида бўлади. Шу давр мобайнида қоидабузарлик такрорланса, 2та ўйин яна қўшиб берилади.
"Ал-Ҳилол" футболчиси ОЧЛ-2014 финал баҳсида "Вестерн Сидней Уондерерс" ўйинчисига юзига тупургани учун ОФК томонидан 8та ўйинга дисквалификаци қилинганди. Саудияликлар ушбу қарорни бекор қилиш юзасидан Лозанна шаҳридаги САСга мурожаат қилишгани учун суд якуний қарор чиқаргунга қадар ОФКнинг қарорини бекор қилиб турганди. Шу боис Носир ОЧЛнинг 4-тури доирасида 8 апрель куни бўлиб ўтган "Фулад"га қарши ўйинда майдонга тушди ва битта гол урди.
Энди у ОЧЛ доирасида яна 3та ўйинни ўтказиб юбориши керак бўлади. Демак, Носир аш-Шамроний эртага бўлиб ўтадиган "Локомотив"га қарши ўйинда ҳам майдонга туша олмайди.
