Бразилия терма жамоасининг собиқ ҳужумчиси Роналдо Францияда бўлиб ўтган хайрия учрашувида хет-трик қайд этди, деб хабар беради euro-football.ru.
"Қашшоқликка қарши ўйин"да Роналдо ва Зинедин Зиданнинг дўстлари "Сент-Этьен" клубининг ҳозирги ва ўтмишдаги юлдузларига қарши тўп сурди. Ғарбий Африкадаги Эбола вирусига қарши курашиш мақсадида ташкил қилинган учрашув "Сент-Этьен"нинг 9:7 ҳисобидаги ғалабаси билан якунланди.
Роналдодан ташқари яқин ўтмишнинг энг кўзга кўринган намоёндаларидан Давид Трезеге, Кларенс Зеедорф, Юрий Жоркаефф ва Жей-Жей Окочалар ҳам ўз ҳисобига гол ёзиб қўйишди.
Учрашувни 33913 нафар томошабин кузатиб борди. Чипталар эса 8-12 доллардан сотилган.
