Москванинг “Динамо” футбол клуби ҳужумчиси германиялик Кевин Кураньи клубдан кетиши ҳақида маълум қилди.
“Мен шартномамни узайтирмасликка қарор қилганим ҳақида айтиш вақти келди. Москвада ўтказган ажойиб 5 йилдан кейин мен клуб билан хайрлашаман. Бу қарорни қабул қилишим осон бўлмади. Бу клуб, унинг ходимлари, ҳамкасбларим, бу шаҳар ва мамлакат мен учун жуда қадрли бўлиб қолганди. Кейинчалик нима бўлишини ҳозирча айта олмайман. Оилам Германияга қайтишни хоҳлаяпти. Мен ҳам, умуман, ўз фаолиятимни бундеслигада давом эттиришга қарши эмасман. Бироқ футболда режалар тузиш осон иш эмас. Қолган ҳафталарда ҳам мен клуб мавсумни муваффақиятли тугалаши учун аввалгидек бор кучим билан ўйнайман”, дейди футболчи.
“Ва энг асосийси: “Динамо” мухлислари, менинг мухлисларим, сизларга катта раҳмат! Сизлар мен учун доимо аҳамиятли бўлгансизлар, бу сезилиб турди. Сизнинг садоқатингиз, қўллаб-қувватлаганингиз учун раҳмат!” деб ёзади Кураньи ўз блогида.