Россия терма жамоаси ҳимоячиси Андрей Ешченко ўзининг спорт машинасида соатига 170 км. тезликда йўл четидаги бетон симёғочга урилган. Бу ҳақда Life News Россия ҳуқуқни муҳофаза қилувчи органлари маълумотларига таяниб хабар бермоқда.

Манбада ёзилишича, бу автофалокат натижасида Nissan GT-R русумли машинага жиддий талофат етган, бироқ футболчининг ўзи деярли ҳеч қандай жароҳат олмаган.

Воқеа Краснодар шаҳрида содир бўлган. Шаҳар кўчаларида ўрнатилган видеокузатувлардан олинган тасвирлардан кўринишича, «Кубан» футболчиси тезликни оширган. Аввалига ўнг тарафдан кетаётган машина, кейинчалик йўлнинг чап тарафига қараб ҳаракатланган ва симёғочга бориб урилган.

ЙТҲ гувоҳларининг маълум қилишича, авария вақтида футболчи маст ҳолатда бўлган. Воқеа жойига етиб келган шифокорлар Ешченкога ёрдам кўрсатмоқчи бўлишганида у бу таклифни рад қилган ва ўзи ҳодиса жойини тарк этган. Кейинроқ спортчи тиббик кўрикдан ўтганида унда ҳеч қандай жиддий жароҳатлар йўқлиги аниқланган.