Сўнгги даврларда яратилган ўзбек кинофильмларида бир актёрни тез-тез кўришга ўрганиб қолгандик - Алишер Узоқов. Кўпроқ комик актёр сифатида танилган бу йигит санъат билан бир қаторда, спортга, хусусан, футболга жуда қизиқиши кўпчиликка маълум. Алишер, бир вақтлар, ҳатто, биринчи лига иштирокчиси бўлмиш «Истиқлол» клубида футболчи сифатида ҳам рўйхатдан ўтганди.
Санъатимизнинг яна бир вакили бўлган қизиқчи Валижон Шамсиев эса ажойиб жангчи, «қора белбоғ» соҳиби. Умуман олганда, санъаткорларнинг спортга меҳр қўйишлари фақат бизда эмас, бутун дунёда кенг русум бўлган. Жумладан, куни кеча беларуслик таниқли қўшиқчи Дмитрий Колдун ўз мамлакатининг 3-дивизиони вакили «Рогачев» клубида тўп сурадиган бўлди. Шу муносабат билан «Газета.Ru» сайти спортга ошно тутинган шоу-бизнес юлдузлари ҳақида ҳикоя қилишга қарор қилди.
Дмитрий Колдун
Беларуслик машҳур хонанда, «Евровидения-2007» иштирокчиси Дмитрий Колдун футболчилик соҳасида ҳам ўз кучини синаб кўришга қарор қилди.
Россиянинг «Юлдузлар фабрикаси»да кашф этилган Колдун Беларусь чемпионатининг 3-дивизионида иштирок этадиган «Рогачев» жамоаси рўйхатидан жой олди. Шоу-бизнес вакили мамлакат биринчилигининг илк турида ҳужумчи сифатида майдонга тушади. Бундан ташқари, айнан ўша куни Дмитрийнинг стадионда яккахон концерт дастури ҳам режалаштирилган.
Шу ўринда бир савол туғилади: Колдун футболчилик касбига қадам қўйганидан кейин ҳам футбол майдонида концерт беришга журъат этармикин?
Ванесса Мэй
Машҳур скрипкачи аёл болалигидан тоғ чанғисига қизиқиб, ушбу спорт тури бўйича ўтказиладиган Олимпиада ўйинларида иштирок этишни орзу қиларди. Аммо унинг Англия терма жамоаси сафидан ўрин олиши амри маҳол эди. Шу сабабли, у отаси таваллуд топган Таиланд давлати термаси таркибида нуфузли мусобақага боришга қарор қилди. Ўтган йили Россиянинг Сочи шаҳрида бўлиб ўтган қишки Олимпиада ўйинларида Мэй отасининг Ванакорн фамилияси остида иштирок этди. Бироқ Ванессанинг медалларни қўлга киритиши борасида ҳеч қандай гап бўлиши мумкин эмасди. Ҳар икки пойгада ҳам таниқли скрипкачи аёл сўнгги ўринни банд этди. Лекин тўрт йилликнинг нуфузли турнирида иштирок этишнинг ўзи унга ҳар қандай натижадан муҳим эди. Бу борада у шундай фикрларни билдирди:
- Бу жуда ажойиб! Турнирда сўнгги поғонани банд этишимни тушунгандим. Аммо Олимпиадада қатнашиш, ўзингни синаб кўриш учун ажойиб имконият. Айрим пайтларда ўз ҳаётингда қандайдир таваккалчиликка ҳам йўл қўйишга тўғри келади, - дея ҳиссиётлари билан ўртоқлашди Мэй-Ванакорн.
Афсуски, кейинроқ Мэйнинг Сочи Олимпиадаси йўлланмасини қўлга киритишида айрим қинғирликларга йўл қўйилганлиги маълум бўлди. Натижада, Ванессанинг Олимпиада ўйинлари йўлланмаси учун ўтказилган саралаш баҳсларидаги натижалари бекор қилиниб, у 4 йил муддатга катта спортдан четлатилди. Аммо бу таниқли скрипкачига унчалик таъсир қилгани йўқ. Боиси, у орзусига етган ва тоғ чанғиси спорти билан жиддий равишда шуғулланмасликка қарор қилганди.
Хулио Иглесиас
Испаниялик буюк қўшиқчининг тарихи бошқа ҳамкасблариникидан анча фарқ қилади. Боиси, у ўзини спортда саҳнадагидан кўра анча эрта намоён этганди. Иглесиас нафақат футбол билан жиддий равишда қизиққан, балки «Реал» (Мадрид) клубининг ёшлар жамоаси дарвозабони ҳам бўлганди. Хулионинг орзуси «қаймоқранглилар»нинг асосий таркибидан ўрин олиш эди. Лекин футболчи бўлиш унинг пешонасига ёзилмаган экан.
1963 йили хонанда автоҳалокатга учраб, мўъжиза туфайли тирик қолганди. Ўша автоҳалокатда у жиддий жароҳат олган, айрим тана аъзолари синганди. Бу эса унинг футболдаги фаолиятини эрта якунлашига сабаб бўлди.
Гарчи ла-лигада «Реал» дарвозасини қўриқлаш насиб этмаган бўлса-да, Иглесиас мусиқа билан жиддий тарзда шуғулланиб, бу борада улкан муваффақиятга эришди.
Лекин айни пайтда ҳам таниқли қўшиқчи миллионлар ўйинига бефарқ эмас. У севимли клуби «Реал»нинг барча учрашувларини бевосита ўйингоҳда кузатади. Хулио «қаймоқранглилар»нинг фахрий «сосьос»и (клуб вакили) саналади.
- +ўшиқчилик соҳасида эришган барча машҳурлигим, концертларимдаги олқишлар, қўлимда микрофон тутган ҳолда эришган ҳамма муваффақиятларимни «Реал» клубининг асосий дарвозабони бўлиш учун алмаштирган бўлардим, - дея тан олади Иглесиас.
Луи Томлинсон
(One Direction)
2013 йил августида чемпионшип вакили бўлган «Донкастер Роверс» футбол жамоаси янги мавсумга машҳур One Direction поп-гуруҳи хонандаси Луи Томлинсонни «заявка»га киритишини маълум қилди.
+ўшиқчи «дайдилар»нинг асосий таркибида майдонга тушмаслиги аввалдан маълум эди. Чунки, Томлинсоннинг клуб захира таркибида майдонга тушишдан асосий мақсади - болалигидаги ниятини амалга ошириш эди, холос. Таниқли қўшиқчи майдонга тушган ўйинда стадионга 10 минглаб мухлислар ташриф буюришди.
- Бу менинг болаликдаги орзуйим эди. «Роверс» билан шартнома имзолаш мен учун катта шараф, - дея таъкидлади Луи.
Аммо Томлинсон жамоада ўйнаш билан чекланиб қолмади ва бир йилдан кейин «Донкастер»ни сотиб олди! Айни пайтда «дайдилар» чемпионшипнинг сўнгги поғоналарида боришмоқда ва келаси мавсумни Англия футбол лигасининг даражаси бўйича 3-лигасида ўтказишлари ҳам эҳтимолдан холи эмас. Лекин таниқли хонандадаги иштиёқ бунга йўл қўймаса керак. Буни эса вақт кўрсатади.
Жастин Бибер
Канадалик қўшиқчи Жастин Бибер спортга жиддий тарзда қизиқади. Футбол борасида таниқли хонандада ўзига хос қийинчиликлар юзага келди. Чунки, у ҳалигача қайси клубга мухлислик қилишига ойдинлик кирита олганича йўқ. Бибер омма олдида гоҳ «Барселона» футболкаси, гоҳ «Реал» майкаси, баъзан «Челси» экипировкасида намоён бўлади.
Ҳаттоки, бир сафар «аристократлар» меҳмони ҳам бўлди. Мазкур учрашувда у нафақат Англия футболи юлдузлари билан суҳбатлашди, балки уларга ўзининг футболчилик қобилиятини ҳам намойиш этди. Бибернинг тўп билан муомала қилиш маҳорати юқори эканлигига «Челси» вакиллари ҳам гувоҳ бўлишди.
Бибер яшил майдонда ўзини нафақат футбол, балки тенннис соҳасида ҳам синаб кўрган. А+Шнинг Калифорния штатида ўтказилган теннис бўйича хайрия кечасида Жастин олдинига ўз ватандоши Эжени Бушар (жаҳоннинг 6-рақамли ракеткаси)га қарши кортга чиқди, кейинчалик эса Бушар билан дуэт ҳосил қилган ҳолда, Фернандо Вердаско, Даниэль Гантухов ва таниқли актёр Уилл Ферреллни синовдан ўтказди.
Барча канадаликларнинг севимли спорт тури бўлган хоккей тўғрисида гапирмасликнинг эса сираям иложи йўқ. Бибер бир пайтлари МХЛ вакили «Торонто» жамоаси машғулотларида иштирок этган, ҳаттоки унга шартнома имзолашни ҳам таклиф этишганди. Тўғри, гап бу ерда «Мэйпл Лифс» эмас, балки Американинг «Бейкерсфилд Кондорс» ҳаваскор клуби тўғрисида бормоқда. Лекин Жастин саҳнани яшил майдонга алмаштирмасликни маъқул деб топди.
Интерспорт газетасидан.
Улуғбек Умаров тайёрлади
