"Барселона"нинг собиқ футболчиси, ҳозирда Туркиянинг "Генчлербирлиги" клуби яримҳимячиси Александр Глеб Феликс Магатнинг "Спартак"ни бошқариши ҳақидаги хабарларга муносабатини билдирди.

Беларуслик футболчи немис мутахассиси қўл остида бир йил тўп сурган.

"Магат "Спартак"да? Нимаям дердим, "Спартак" учун хурсандман. Магат келса йигитлар аввалгидан кўра уч-тўрт марта кўпроқ ишлашларига тўғри келади. Уларда танлаш имконияти қолмайди. Фаолиятимдаги энг қаттиққўл ва талабчан мутахассис.

Агар футболчилар унинг талабларини бажарсалар майдонда учиб юрадиган бўладилар. "Спартак" жисмонан чемпионатнинг энг яхши жамоаси бўлади ва ишонаманки, у билан кўтарилади.

Агар Магат келадиган бўлса, футболчилар Эмерининг қайтишини тилаб дуо қиладилар. Мутлақ тартиб-интизом. Юз грамм ортиқча вазн - жарима. Тушликка бир дақиқа кеч қолиш - жарима. Кийиниш хонасида телефонингни вибрацияга қўйдингми - жарима. Ҳавони булғадингми - жарима. Майли, охиргисини сал бўрттириб юбордим. Кун тартибини ёдлаб олган маъқул, яхшиси таваккал қилмасдан, вақтлироқ келиш.

Агар жамоа мағлубиятга учраса, бундан ҳам қаттиқроқ жазолар кутади. "Штутгарт"да тунги машғулотлар жорий қилган. "Вольфсбург"да соат тунги учда ўйинни муҳокама қилиб, тонгда бир ярим соатлик кросс уюштирган.

Чет эллик мураббийлар Россияда ишлашга қийналадилар, аммо Феликс эплаб кетса керак. Ҳаммаси унинг айтганидай бўлиши керак ёки ҳеч нарса бўлмаслиги керак", - эслайди Глеб.