«Динамо» - «Пахтакор» учрашувидан сўнг дастлаб мезбонлар бош мураббийи ўйиндан кейинги фикрлари билан ўртоқлашди.
«Бугун иссиқ ҳавода тўп суриш ҳар икки томон учун қийинчилик туғдирди. Биринчи бўлимда стандарт вазияти – бурчак тўпи вақтида йўл қўйган битта хатомиз натижага таъсир қилди. Таркиб борасида ҳам муаммолар борлиги, бугунгидек кучли ва пешқадам жамоага қаршилик кўрсатишимизга таъсир қилди. Умуман олганда жамоа харакатидан қониқдим» - дейди мураббий.
«Чиндан ҳам таркибимизда муаммолар бор эди. Икки асосий ҳимоячимиз Акмал Холмуродов ва Илдар Маматказинлар ижара келишувига биноан майдонга туша олмасди. Уларнинг ўрнига туширилган ёш ўйинчилар бугун анча яхши ҳаракат қилган бўлишсада, ҳали бундай ўйинларга тўлиқ тайёр эмаслар. Сўнгги ўйинларда жамоамиз ўйинида ўсиш кузатилган бўлсада, якунда кичик ҳисобдаги мағлубиятлар билан чекланаяпмиз. Кейинги ўйинларда бугун жамоани қўллаб-қувватлашдан тўхтамаган мухлисларимизни хурсанд қилишга интиламиз» - дея фикрини якунлади Тачмурод Шамакович.
