Хулиан Алварес ва “Атлетико Мадрид” ўртасидаги зиддият янгича тус олди. Клуб омма олдида ҳужумчи сотувга қўйилмаганини ва унинг Жаҳон чемпионати вақтида билдирган фикрлари бир томонлама қабул қилинган қарор бўлганини таъкидламоқда. Бироқ аргентиналик футболчининг яқинлари воқеалар бутунлай бошқача кечганини айтмоқда.

Журналист Мартин Аревалонинг маълумотига кўра, Хулиан Алварес ўз позициясини оммага маълум қилишидан аввалроқ “Атлетико” раҳбариятига жамоани тарк этиш истагини билдирган. Бироқ айнан “Атлетико” раҳбарияти футболчини унинг клубдан кетиш истагини оммага очиқ эълон қилишга ундаган.

Бундан кўзланган мақсад Алваресни трансферга ундаётган томон айнан унинг яқинлари экани, бу қарор клуб томонидан қабул қилинмаганини мухлисларга кўрсатишдан иборат бўлган. Алварес ушбу тавсияга амал қилган ва Жаҳон чемпионати вақтида илк бор жамоани тарк этиб, бошқа клубга ўтиш истагини очиқчасига билдирган.

“Атлетико” ўз позициясини ўзгартирган. Муаммо шундан кейин юзага келган. Манбанинг таъкидлашича, “Атлетико” раҳбарияти Алварес ўз истагини охир-оқибат оммага ошкор қилишини кутмаган. Шу сабабли клубнинг муносабати футболчи ва унинг вакиллари кутганидан бутунлай бошқача бўлган.

Ҳужумчи аввалроқ “Атлетико Мадрид” вакиллари билан музокара ўтказган ва жамоани тарк этиш имконияти мавжудлигини тушунган. Бироқ унинг баёнотларидан сўнг “Атлетико” ўз позициясини кескинлаштириб, омма олдида Хулиан Алварес сотилмаслигини маълум қилган.

Аревалонинг сўзларига кўра, бу ҳолат футболчининг вакилларида жиддий норозилик уйғотган. Улар аргентиналик футболчи ўзидан сўралган ишни бажарганидан кейин клуб раҳбарлари “ўйин қоидаларини ўзгартирган”, деб ҳисобламоқда.

“У баёнот берганидан кейин ‘Атлетикў раҳбарияти бундан норози бўлди, чунки улар Алварес буни амалга оширишини кутмаганди”, дейди аргентиналик журналист.

Футболчининг яқинлари клуб уларга “ёлғон гапиргани”, Хулиан Алварес ва унинг вакиллари эса ўзларини “алданган ва хиёнат қилинган” деб ҳис қилаётганини таъкидламоқда.

Бу версия “Атлетико” бош директори Мигел Анхел Хил Мариннинг оммавий баёнотларига зид келади. У клуб ҳужумчини қўйиб юбориш ниятида эмаслигини очиқ айтган. “Атлетико” раҳбари, шунингдек, “Барселона”ни шартнома асосида клубга тегишли футболчи бўйича музокара олиб боришга уринишда айблаб, клуб ўз манфаатларини ҳимоя қилишини таъкидлаган.

Икки томон ўртасидаги сўзлар жанги давом этмоқда. Эндиликда вазият “Атлетико” ва Алварес музокара столига ўтириб, келишувга эриша олиш-олмаслигига боғлиқ.

Клуб футболчининг Мадридда қолиши кераклигини таъкидламоқда, Алварес эса “Мадрид даврини якунлаш вақти келганига” ишонмоқда.