Хитойнинг Ухань шаҳрида енгил атлетика бўйича катталар ўртасида ўтказилган Осиё чемпионатида Ўзбекистон терма жамоаси аъзолари 2 та олтин, 1 та кумуш ва 1 та бронза медалига сазовор бўлиб, умумжамоа ҳисобида 7-ўринни эгаллашди.

Терма жамоамиз ҳисобига олтин медалларни Светлана Радзивил (баландликка сакраш) ва Екатерина Воронина (еттикураш) келтиришган бўлса, найза улоқтириш мусобақасида Ватанимиз шарафини ҳимоя қилган Бобур Шокиржонов кумуш (79 м. 09 см), 10 км. масофага югуриш баҳсида иштирок этган Андрей Петров (30 дақиқа-ю 20.68 сония) эса бронза медалига сазовор бўлдилар.

Осиё чемпионатида 15 та олтин, 13 та кумуш ва 13 та бронза медалини қўлга киритган Хитой терма жамоаси умумжамоа ҳисобида биринчи, қатарлик атлетлар иккинчи (7-2-1), Ҳиндистон вакиллари эса учинчи (4-5-4) ўринни банд этишди.

Ушбу жадвалда Япония термаси тўртинчи (4-3-11), баҳрайнликлар бешинчи (3-3-2) ва ниҳоят БАА атлетлари олтинчи (3-1-0) ўринларни банд этдилар. Кучли ўнликдан Хитой Тайпейи (1-4-1, 8-ўрин), Қозоғистон (1-3-3, 9-ўрин) ва Ж.Корея терма жамоаси (1-1-1) жой олишди.