Ямайкага қарши учрашувда ғалаба тўпини киритган Аргентина терма жамоаси ҳужумчиси Гонсало Игуаин ўзига берилган имкониятдан унумли фойдаланганидан мамнун эканини маълум қилди. 

“Наполи” форварди борди-ю Аргентина чорак финалда Бразилия билан рўбарў келса, Дунга шогирдлари жиддий муаммога дуч келишларини таъкидлади.

– Гуруҳдан биринчи ўрин билан плей-оффга чиқиш энг асосий вазифамиз эди, – дея Игуаин сўзларини келтиради Спорт Экспресс. – Ҳа, таваккал қилишимизга тўғри келди, бироқ ўйин осон кечмаслигини яхши билардик. Қийинчиликларга қарамай ғалабага эришдик. Имкониятдан унумли фойдаланганимдан хурсандман. Терма жамоада рақобат жуда юқори, шу сабабли ўзингга берилган ягона имкониятдан ҳам унумли фойдаланишинг жуда муҳим. Бугун бахтимизга ҳаммаси яхши якун топди. Чорак финалда Бразилияга тушиб қолсак? Вазият қандай бўлишини билмайман. Лекин агар шундай бўлса, уларга осон бўлмайди.