«Палермо» клуби форварди Пауло Дибала учун мавсум норасмий тарзда тугади ҳисоб. Чунки, май ойи аввалида клуб президенти Маурицио Дзампарини бош мураббий Жузеппе Якинига жароҳатланиб қолиши мукинлигини назарда тутиб, Дибалани ўйинга туширмасликни буюрди. Чунки ,бугун-эрта бу иқтидор соҳибига «Ювентус» каттагина пул тўлаши кутилмоқда. Sovsport.ru манбаси асосида 21 ёшли аргентиналик ана шу футболчи ҳақида ҳикоя қиламиз.
ОТА ОРЗУСИ
Пауло 15 ёшга тўлганида отаси саратон касаллигига йўлиқиб, оламдан кўз юмди. Ўсмир бола бу пайтда ёшларнинг «Институто» жамоасида тўп сурарди. 17 ёшга кирганида Аргентинанинг икинчи дивизионидаги асосий жамоа аъзосига айланди. Дастлабки мавсумнинг ўзидаёқ у 38 та ўйинда 17 та гол уриб, эътиборга тушди. Ке-йинроқ у журналистларга: «Отам учта ўғлидан биттаси футболчи бўлишини орзу қиларди. Мен унинг орзусини амалга оширганимдан, хурсандман. Ахир у бир соатлик йўл юриб, мени ҳар куни футбол машғулотларига етаклаб борарди. Иккита акам бундай имкониятдан фойдаланмади. Мен эса падарим ҳаққи-ҳурмати унинг нияти рўёбга чиқиши учун ўзимни бурчли деб билдим», дея интервью берганди.
Дибаланинг маҳорати Аргентинадаги европалик скаутлар томонидан эътиборсиз қолмади, албатта. Жанубий Америкадаги трансфер бозорида кўзга кўринган «Палермо» жамоаси эса бу борада ҳаммадан кўра «учарроқ» чиқди.
Иқтидорли йигит учун Дзампарини 12 млн. евродан шунчаки кўз юмди! Яна бир эътиборли томони, Дзампарини ўтган йил давомида истеъдод соҳиби 40 миллион евродан ҳам баланд туришини тан олишдан ҳижолат қилмади. Бундан 3 йил авал бу ҳужумчини сотиб олаётганида албатта таваккалига иш тутди. «Мен ўшанда таваккал қилгандим. Энди сизлар бунинг натижасини кўринглар!» дея мақтанади бугун сициялик президент.
ИШОНЧНИ ОҚЛАДИ
Пауло Италиядаги аввалги иккита мавсум давомида 8 та гол муаллифига айланди. Дастлаб «А» сериясида рақиб дарвозасига 3 та, кейинроқ «В» сериясида 5 та гол киритди. Маурицио Дзампарини ўтган ёзда аргентиналик йигитчага имконият бериш кераклигини назарда тутиб, «В» сериясининг асосий голурарлари ҳисобланган Абель Эрнандес ҳамда Кайл Лаффертилар билан муносабатига нуқта қўйди. Эрнандес «Халл Сити»га 12 млн еврога сотиб юборилди.
Дибала Дзампаринининг ишончини оқлади - «А» сериясида 33 та ўйин мобайнида 13 та гол ва 10та тўпузатишларни амалга оширди. Айни пайтда «гол}пас» кўрсаткичи бўйича у фақат ватандоши Тавесдан (27) орқада холос.
Кавани ва Пасторе, Дибала ва Васкес... УЕФАнинг расмий сайтига интервью бериш чоғида Паулодан Жанубий Америкадан келган йигитлар учун «Палермо»да ўйнаш қандай кечаётганлигини сўрашганида у: «Клубнинг ўзига хослиги шундаки, бу ерда янги ўйинчилар шароитга мослашиб кетишлари учун имконият бериларкан. Ҳаттоки, улар дастлаб кутилганидек натижани бермасалар ҳам эътироз бирдирилмас экан. Биз сингари ёш ўйинчилар учун бу жуда-жуда муҳим», дея жавоб берганди.
Шунингдек, Дибала итальянча турмуш тарзига мослашиб кетганлиги унинг учун ўйинда қўл келаётганлигини ҳам тан олган. «Бу ернинг иқлими мен учун ниҳоятда маъқул тушди. Дастлаб Палермога келганимда ҳаво жуда иссиқ эди. Шу сабабли денгизга ошиқдим. Пляжни кўрганимда ўзимни худди жаннатдагидек ҳис қилдим. Шунингдек, маҳаллий ошпазлар томонидан тайёрланган овқатлар, ширинликлар ҳам менга жуда ёқиб тушди. Айниқса канноли жону дилимга айланди», деганди у интервьюларининг бирида.
РОНАЛДИНЬО ВА МЕССИГА ЎХШАБ
Ўтган кузда Антонио Конте бу йигитчага Италия термасига киришни таклиф қилди. У эса бунинг учун онаси билан маслаҳатлашиб олиши кераклигини айтди. Ахир отасидан кейин унинг учун энг яқин инсон онаси бўлиб қолганди-да. Шундай қилиб, улар бу таклифни рад этишга келишдилар. «Албатта, Конте менга бундай таклиф билдиргани учун ундан ниҳоятда миннатдорман. Аммо мен Аргентина термасида Месси билан бир сафда тўп суришни орзу қилганман. Шунинг учун туғилган мамлакатим термасига таклиф қилмагунларига қадар, бундай дақиқаларни кутган ҳолда ўйнайвераман», дея ўз муносабатини билдирди.
Ҳозирча эса у фақат PlayStation ўйинларидагина ўзини Месси билан бир жамоада кўра олади, холос. Шунингдек, улар билан бирга Рональдиньо ҳам тўп суради.
Юқори тезлик билан тўпни ҳаракатлантириш ва унинг устидан назорат олиб боришдек хусусияти туфайли Дибалани бу иккала иқтидор соҳибларига қиёсласа бўлади. Жарима майдонидан ташқарида турган ҳолатда ҳам яхшигина зарба бера олиш эса уларни бирлаштириб турадиган иккинчи фазилат саналади. Агар Дибала, Месси ва Рональдиньо иштирокида узоқдан туриб дарвозани ишғол қилиш бўйича танлов ўтказилганида, бу тадбирга кириш учун чиқариладиган чипталар бир зумда сотилиб кетарди.
Албатта бундай мусобақа ҳақида фақат орзу қилиш мумкин холос. Машҳур футболчилардек бўлиш учун эса Паоло ҳали анчайин тер тўкишига, топ-клубда ўзини кўрсатишига тўғри келади.
Афтидан бундай топ-клуб учун «Ювентус» танланса керак. «Дибала -«Ювентус» ўйинчисидир. Ахир бизнинг клубимиз келажак учун пухта замин яратади». Бу сўзлар Жузеппе Якинига тегишли. Шунингдек, у Sky Sport Italiaга берган интервьюсида: «Мен Дибала билан интернетда мулоқот қилишни хуш кўраман. Чунки уни Италияда тўп сураётган энг яхши ўйинчилардан бири деб биламан. У билан бир жамоада ишлаш мен учун ниҳоятда мароқли», деганди. Сўнгги хабарларга кўра, форвард «Юве» учун тиббий кўрикдан ўтган эмиш.
