Бугун Хитой супер лигасида ўтган турнинг қолдирилган беллашуви ўтказилади.

Унда ҳамюртимиз Анзур Исмоилов тўп сурадиган “Чанчун Ятай” “Шижиажуанг Эвер Брайт”га қарши баҳс юритади. Тошкент вақти билан 16:00 да старт оладиган мазкур матч орқали бу икки жамоа ҳам ўз ҳисобидаги ўйинлар сонини қолган жамоалар каби 21тага етказиб олади.

Шу ўринда сизга “Чанчун Ятай” жорий мавсуми қандай ўтказаётгани ҳақида бироз маълумот берсак.

Чанчунликлар учун 2015-йилги мавсум унчалик омадли ўтаётгани йўқ. Клуб ҳозирга келиб 20 учрашувда 25 очко жамғарган ҳолда мусобақа жадвалининг 9-поғонасида бормоқда. Бир пайтлар Осиё чемпионалар лигаси йўлланмалари учун кураш олиб борган жамоанинг бундай ўринларда бориши жамоа раҳбариятига ва мухлисларга хуш ёқаётгани йўқ, албатта.

Шу боисдан жамоа май ойида бош мураббийни ўзгартирди. “Чанчун Ятай”га хорват мутахассиси Марио Тот олиб келинди. Натижада клуб ўйини секин-аста яна барқарорлаша бошлади.

Бевосита ҳамюртимиз Анзур Исмоилов фаолиятига тўхталиб ўтсак, 30 ёшли тажрибали ҳимоячи мана 4 мавсумдирки, хитой жамоаси сафида ўйнаб келмоқда. Унинг кўрсатадиган ишончли ўйини туфайли мухлислар ва мураббийлар Анзурни ёқтиришади. Ҳимоячи 18-турда “Жиангсу” дарвозасини ишғол қилиб, мавсумдаги голлари ҳисобини очиб олишга ҳам муваффақ бўлди.

Умид қиламизки, Анзур Исмоиловнинг жамоаси яна етакчи жамоалар қаторига қайтади ва футболчимиз ишончли ўйин намойиш этишда давом этади.