Хабарингиз бор, Ўзбекистон терма жамоаси 19-26 июль кунлари ўқув-машғулот йиғинини ўтказди. Тошкентда бўлиб ўтган йиғинда Виктор Жалилов бошчилигидаги Ўзбекистон олимпия терма жамоасига қарши иккита назорат ўйини ўтказилди. Шу ўринда айтиш жоиз, катта танаффусдан сўнг терма жамоага «Пахтакор» ярим ҳимоячиси Станислав Андреев таклиф этилди. Ана шу йиғиндан сўнг sports.uz сайти мухбири 27 ёшли футболчи билан қисқача суҳбат уюштирди.
- Олимпиячиларга қарши кечган ўйинлардан қандай таассуротлар қолди?
- Биз янги бош мураббий қўл остидаги дастлабки учрашувларни ўтказдик. Янги тизим бўйича ҳаракат қилдик. Аста-секинлик билан бир биримизни тушуняпмиз. Олимпиячиларга қарши кечган учрашувлар осон кечмади. Чунки ёш футболчилар ўзларини кўрсатиш учун бор имкониятларини ишга солишди. Бунинг устига, улар миллий терма жамоага ҳам номзод футболчилар ҳисобланишади.
- Машғулотлар жараёни ҳақида гапириб ўтсангиз.
- Биз «нагрузка»лар остида иш олиб бордик. Асосий эътиборни жисмоний тайёргарликларга қаратдик. Бир кунда икки маҳалдан шуғулланиш қандай бўлишини биласиз. Умуман олганда, жараён қизиқарли кечди. Самвел Бабаяннинг талаблари менга маълум. Шу боис ҳам машғулотларга киришиб кетишим қийин кечмади.
- Терма жамоага чақирилмаганингизга ҳам анча бўлганди...
- Менимча бу ҳолат 2013 йилдаги оғир жароҳат билан боғлиқ бўлса керак. Шундан сўнг бирор марта терма жамоага чақиришмади.
Умуман олганда, таркиб танлаш - мураббийнинг иши. Рўйхатга кирмадингми, демак айни вақтда тўлиқ тайёр эмассан. Буни тушуниш ва ҳар бир мураббийнинг ўз ғоялари борлигини англаб етиш керак. Мураббийлар штабининг ҳар қандай қарорини тўғри қабул қилиш лозим.
- Жорий мавсумда рақиблар дарвозасини етти марта ишғол қилдингиз. Бундай сермаҳсуллигингиз сабаби нимада?
- Мана бир ярим йилдирки, ҳужумкор футбол намойиш қилмоқдамиз. Бунда Самвел Бабаяннинг хизматлари катта.
- Жамоада янги маслаҳатчи мураббий иш бошлади. У билан танишишга улгурдингизми?
- Ажойиб мутахассис. Албатта, ҳали яхши танишиб улгурмадик. Аммо дастлабки таассуротлар ижобий бўлди. Унинг узоқ вақт Россияда муваффақиятли фаолият олиб борганидан хабарим бор. Энди эса биз билан ишлайди.
