Мадриднинг “Реал” клуби ҳужумчиси Криштиану Роналду британиялик ҳайкалтарош Майкл Уэйдга ўзининг мумдан ишланган ҳайкалига буюртма берди ва бунинг учун 20 минг фунт стерлинг (30 минг доллар) тўлади. Бу ҳақда Daily Mail нашри хабар бермоқда.
Футболчи Мадрид музейида икки йилдан бери томошага қўйилган ҳайкалининг айнан нусхасини тайёрлаб беришни сўради. Португалияликнинг айтишича, у бу ҳайкал билан Испаниядаги уйларидан бирини безатмоқчи.
“Бизда 2013 йилда Роналду шаклини қуйиш учун ишлатган қолипимиз сақланиб қолган, шунинг учун бу гал унинг ҳайкалини тайёрлаш осонроқ бўлади. Криштиану бизга ҳайкал учун бутсалари ва футболкасини юборишга ваъда берди. Бу галги ҳайкал аввалгисидан фақатгина соч турмаги билан фарқ қилади, холос. Футболчи бизга сочларига тегмаслигимизни илтимос қилди. Ҳайкалнинг соч турмаги билан унинг шахсий сартароши шуғулланадиган бўлди”, деб айтмоқда ҳайкалтарош.
Март ойида Роналду Мадриддаги мум ҳайкаллар музейида қўйилган ҳайкалининг сочи ҳолатини кузатиб турувчи стилист ёллаган эди.
