Бугунги кунда ўзбек футболида Равшан Эрматовнинг тутган ўрни ниҳоятда катта. ҳакам сифатида Ўзбекистон номини бутун дунёга танитиб бораётган юртдошимизнинг эришаётган ютуқларига ҳар қанча ҳавас қилса, арзийди. Эрматов йилдан-йилга янгидан янги ютуқларни, марраларни забт этиб боряпти. дуён футболида ўз номини зарҳал ҳарфлар билан ёзган Равшан Эрматов “Даракчи” газетасининг навбатдаги меҳмони бўлди...
— Равшан ака, Ватанимиз истиқлолга эришганидан сўнг ўзбек спорти нуфузи қай даражада ошди деб ўйлайсиз?
— Ватанимиз Мустақил бўлганидан сўнг авваламбор ўзбек спортчиларининг олдида кенг имкониятлар эшиги очилди. Чунки истиқлолга эга чиққанимиздан сўнг спортчиларимиз юртимиз шарафини халқаро майдонларда ҳимоя қилишни бошлади. Бу эса энг катта ютуқларимиздан бири бўлди. Бир сўз билан айтадиган бўлсам, ҳозирга қадар спорт ортидан нималарга эришган бўлсак, ҳаммасига айнан шу истиқлол даврида эришдик. Ҳалибундана кўпроғига эришимиз керак.
Биринчи навбатда миллионлар ўйини — футболга эътибор ниҳоятда ошди. Бунинг самарасини ҳам кўра бошладик. Ўзбек футболининг пойдевори яратилди. Футбол мактаблари, академияларидан иборат инфратузилма пайдо бўлди. Ишончим комилки ўзбек футболининг ютуқлари ҳали олдинда, бугунгача эришганларимиз билан чекланиб қолмаймиз ҳамда ўсишда бардавом бўламиз.
— Футбол бўйича иккита жаҳон чемпионатида қатнашиб, 9 та учрашувни одилона бошқариб, рекорд ўрнатдингиз. Навбатдаги жаҳон чемпионатига қадар бироз вақт бор. Айтингчи, бу рекордингиз олдинда турган мақсадлар учун трамплин вазифасини бажарадими?
— Албатта. Биласизми, спортда ўз олдингизда катта мақсад ёки вазифа қўймасангиз, интилишда давом этмасангиз, ўсиш бўлмайди. Бирор ютуқга эришганингиздан кейин, янги марраларни забт этиш ҳақида ўйлашингиз керак бўлади. Спортчи олдига доимо юқори мақсадлар қўйиши, шунга яраша ишлаб бориши шарт. Меҳнатсиз натижа бўлмайди. Жаҳон чемпионати бу жуда катта мусобақа ҳисобланади. Бу мусобақани бутун дунё тўрт йил давомида кутади. Иккита мусобақада ўйинларни бошқарган бўлсак-да, ҳали қиладиган ишларимиз кўп деб биламан. Олдинда турган мусобақага тайёргарлик кўришимиз ва янада яхшироқ натижалар учун курашишимиз лозим. Юртимиз шарафини жаҳон чемпионатида муносиб тарзда ҳимоя қилиш имкониятимиз бор. Шундан фойдаланиб қолиш учун меҳнат қилиш керак.
— Жаҳон чемпионатлари иштирокчиси, Осиёнинг энг яхши ҳаками, клублар ўртасидаги мундиалнинг финал баҳси сингари йирик мусобақаларда қатнашган бўлсангизда ҳали эришмаган ютуқларим бор деб айта оласизми?
— Мақсадлар кўп. Жаҳон чемпионатларида 9 та учрашувни бошқарган бўлсамда бу натижаларим билан тўхтаб қолмасдан, мундиалдаги ўйинларим сонини 10 та ёки 11тага кўпайтиришимиз ҳам мумкин. Бу яхши кўрсаткич бўларди. Асосийси, бугунги кундаги муваффақиятларимиздан ҳаволаниб кетмаслигимиз керак.
— Ҳар бир спортчининг ўз кумирлари бўлади. Равшан Эрматовнинг ҳам ҳам кумири борми?
— Жамолалар ёки футболчилардан кумирим йўқ. Чиройли футболнинг мухлисиман. Лекин Ўзбекистон миллий терма жамоасига ишқибозлик қиламан. Улар ғалаба қозонса, бошим кўкка етиб хурсанд бўламан. Ҳакамларга келсак, илгарилари Перлуиджи Коллина, Маркус Мерк, Андрей Фриц сингари жаҳон таниган рефериларга ҳавас қилардим. Айни паллада улар ўз фаолиятини тугатишган. Ҳозирги таниқли ҳакамлар билан дўстмиз. Семинарларда бирга бўлиб, фикр алмашамиз. Шу боис уларни кумир эмас, дўстларим деб ҳисоблайман.
— Машҳурлик борасида ҳар қанча мақтансангиз арзийди. Айтингчи, машҳур бўлганингиз сизга нима берди?
— Тўғрисини айтсам, мен ўзимни машҳур инсон деб ҳисобламган бўлардим (кулади). Бундан анча йил аввалги Равшан Эрматов қандай инсон бўлган бўлса, ҳозирда ҳам худди шундайман. Ҳаётимда бўлган ўзгариш сифатида вақт тақчиллигини айта оламан. Аввалари вақтим бироз кўп бўлган. Айни дамда эса вақтим камроқ.
— Демак юлдузлик касалига чалинмагансиз?
— Йўқ. Бу менга ёт тушунча ҳисобланади. Ҳамма қатори инсон сифатида қабул қилишларини хоҳлайман.
— Чиндан ҳам ҳакамларнинг вақти кам бўлади. Айниқса, ФИФА тоифасидаги реферилари жуда кўп сафарда бўлишини биламиз. Оила аъзоларингиз уйда кам бўлишингнизни қандай қабул қилишади?
— Улар буни тўғри қабул қилишади, тушунишади дея оламан. Сиз таъкидлаганингиздек, сафарларда кўп юрган пайтимизда оила аъзоларимизга, дўстларимизга вақт ажратишимиз қийин кечади. Бироқ вақт топилди дегунча, оилам бағрида бўлишга интиламан. Мен ўз ишимга профессионал тарзда ёндошишимни оила аъзоларим яхши тушунишади ва эътироз билдиришмайди.
— Келажакда Равшан Эрматов оиласидан унга муносиб издош етишиб чиқиши мумкинми?
— Бу қизиқишлардан келиб чиққан ҳолда ҳал бўлади. Фарзандларим қайси касбга қизиқишса, шуни танлаши керак деб ўйлайман. Чунки ёқтирмаган соҳага мажбурлаб олиб кириб бўлмайди. Инсон ўзи ёқтирган ҳолда касб танласа мақсадга мувофиқ бўлади. Агар фарзандларим ҳакамликка қизиқиб, уни танласа, қўлимдан келганча ёрдам беришга ҳаракат қиламан.
— Равшан ака, сиз дастлаб футбол билан шуғуллгансиз. Кейинчалик жиддий жароҳатдан сўнг тўп тепишни бас қилган ҳолда, ҳакамлик касбини танлагансиз. Айтингчи, футболда қолганингизда мана шундай ютуқларга эриша олармидинигиз?
— Очиғи, ҳакамлик касбини танлайман деб сира ҳам ўйламагандим. Ўзбекистон миллий терма жамоасида тўп суришни ва жаҳон чемпионатида ватаним шарафини ҳимоя қилишни хоҳлардим. Буни қарангки, ҳакамликга ўтганимдан сўнг бундай имконият юзага келди. Ишонаманки, футболчи бўлганимда ҳам шундай натижаларга эришган бўлардим. Чунки мен ўз ишимга доим жиддий ёндошганман. Бир ишни бошладимми, унга боримни беришга ҳаракат қилганман. Инсон ўз вазифасини фидоийлик билан бажармаса, бирор нимага эриша олмайди. Футбол ўйнаган вақтимда ҳам шундай эдим...
— Кўп кузатганман, ҳар қандай вазиятда ҳам босиқлик билан қарор чиқариб келгансиз. Ҳеч қачон футболчилар билан жиддий тортишувларга бормагансиз. Майдонда ва ҳаётда феъл-атворингиз бир хилми?
Чиндан ҳам футбол майдонида футболчилар жуда асабий бўлишади. Ҳакамлар ҳам асабий бўлса, бу баҳс жиддий тортишувларга сабаб бўлиб қолиши ҳеч гапмас. Шу боисдан ҳакам доимо совуққон бўлиши ва ҳар қандай вазиятда ҳам ўзини босиши даркор. Майдондан ташқарида ҳам доим босиқлик билан қарор чиқаришга одатланганман. Бировга озор беришни ёки жиғибийрон бўлиб юришни истамайман. Ҳамма ишни самимийлик, хушмуомилалик билан ҳал қилишга уринаман. Шу орқали мақсадларим сари илдамлаб боравераман. Суҳбат учун ташаккур. Сиздан янада улкан ютуқларни кутиб қоламиз. Раҳмат.Иззат Абдуваҳобов сухбатлашди
