Иқтисодий қийин шароит Россия футбол бозорига катта таъсир қилди. Ҳарқалай, мамлакат клублари охирги трансферлар мавсумида анча сокин ҳаракатланишди - ақлни шошириб қўядиган харидлар амалга оширилмади. Хўш, трансфер бозоридаги сустлик айнан нималарда яққол кўзга ташланди?

Валюта курсининг тинмай ўсиши ва «қопағон» даражага келганлиги  клубларни камтарона иш тутишга мажбур этди. Шунингдек, легионерларга нисбатан қўйилган янгича чеклов ҳам баъзи режаларга тўсиқ бўлди. Мисол учун, «Зенит» Европа бозорига чиқиш ва кўзга кўринган легионерларни сотиб олишни мўлжаллаб турганди, бироқ... Хуллас, якунда Россия премьер-лигаси жамоалари янги футболчилар трансфери учун умумий ҳисобда атиги 17,93 млн. евро сарфлашди (transfermarkt.de сайти маълумоти). Бу охирги 10 йилда кузатилган энг паст кўрсаткичдир. Россияда сўнгги марта 2003 йили бундан озроқ харажат қилинган эди - 16,15 млн. евро. Агар трансферларга ажратилган маблағни ўтган йилги кўрсаткич билан таққосласак, умумий сумма нақ 60,86 миллион еврога камайгани кўринади.

Тўғри, иқтисодий беқарорлик ва қатъий лимит ҳам клубларни кенг сотув ишлари билан банд бўлишдан қайтаргани йўқ. Дейлик, футболчиларни сотишдан олинган даромад 14,43 миллион еврога кўпайди ва бу рус премьер-лигасидаги сотув динамикасига мос.

Ҳозирги қийин шароитда битта яхши томони ҳам бор: харажатларнинг пасайиш сальдони эпақага келтирди. Чунончи, Россия клублари нақ 6 йил давомида ёзги трансферлар мавсумидан фойда билан чиқмагандилар. Ҳозирги, янги футболчилар хариди учун ажратилган маблағ ва сотувдан олинган сумма ўртасидаги фарқ - 34,2 млн. евро эса Россия футболи учун рекорд ҳисобланади.

Иқтисодий танглик туфайли футболчиларни текинга ўтишлари кўпайди. Охирги йилда бундай келишувлар 49дан 56 фоизга ошди. Шунинг баробарида, тўлақонли ва нисбатан қимматбаҳо трансферлар миқдори деярли икки маротаба камайди - 16тадан 9тага (14 фоиздан 10 фоизга). Шу жойда эътиборга олиш керак, transfermarkt.de сайти бир қатор иккинчи даражали ва арзон келишувлар қийматини келтирмаган (доира шаклидаги диаграммада - Mini-тўлов). Барча маълумотларни имкон қадар аниқлаштириш учун эса, футболчиларнинг келишув пайтидаги тахминий нархи олинган. 2015 йили бундай келишувлар сони 10та бўлди ва уларнинг умумий қиймати 4,8 млн. еврони ташкил этди. Бир йил олдин бундай трансферлар сони 16та бўлиб, умумий сумма 27,35 млн. еврога етганди.

Умумий ҳолда айтганда, 10та жамоа лоақал битта трансферга пул тўлаган бўлса, 6таси шунчаки, эркин агентларни таклиф этиш ёки футболчиларни ижарага олиш билан чекланди. Булар - «Зенит», ЦСКА, «Краснодар», «Динамо», «Локомотив» ва «Мордовия». Таққослаш учун келтирсак, ўтган йили атиги 3та клуб харажатдан тийилган ва уларнинг ҳаммаси камтарин эди: «Мордовия», «Ростов» ва «Терек».

Бозордаги сустлик айниқса, «Зенит», «Динамо» ва «Локомотив» клублари мисолида яққолроқ кўзга ташланди. Питерликлар ўтган йили ҳеч кимни сотмасдан, харидларга 22,8 млн. евро ажратишганди. Энди эса ҳеч кимни сотиб олишмади, ваҳоланки, трансферлардан 18 млн. евро топишди. «Динамо» ҳам харид бобида сукут сақлади. Москваликлар ўтган йили 18,5 млн. еврога янги футболчилар сотиб олишганди. Бу сафар эса фақат сотишди - 11,1 млн. еврога. «Локомотив»га келсак, бир йил олдин чўнтагидан 10,5 млн. евро чиқарган клуб энди футболчиларидан бирини 700 минг еврога пулладию, кимнидир харид қилишни хаёлига ҳам келтирмади. Бу борада биргина «Спартак» нисбатан барқарорликни сақлаб қолди. Пойтахт клуби 2014 йили 11,5 млн. евро сарфлаганди, бу йил эса 12,5 «лимон» баҳридан кечди. Шунинг баробарида Аленичев жамоаси Россия бўйича трансферларга энг кўп маблағ сарфлади. Айтганча, «Спартак» охирги марта 2014 йилнинг ёзида энг серхаражат жамоа мақомини олганди.

Трансферлар бюджетининг қисқариши футболчилар географиясига ҳам таъсир қилмай қолмади. Рус клублари мавсум-2014|2015 олдидан Англия, Голландия, Франция, Италия, Бельгия ва Туркия чемпионатларидан футболчи таклиф этган бўлсалар, бу сафар фақат Португалия, Греция, Италия, Уругвай, Польша ҳамда Сербия биринчиликлари иштирокчилари билан шартнома тузишди. Натижада Россия лигаси трансферлар бўйича фаолликни ўз ичига олган жаҳон рейтингида кескин пастлади. Аниқроқ айтсак, Россия премьер-лигаси янги футболчилар харидига пул тўлаш бобида 16-қаторга тушди.

Ёзги трансферлар мавсумида янги

футболчилар харидига энг кўп

сарфлаган лигалар

1.     Англия (АПЛ) - 1,18 млрд. евро

2.     Италия («А» серияси) - 576,45 млн. евро

3.     Испания (примеро) - 573,7 млн. евро

4.     Германия (бундеслига) - 410,43 млн. евро

5.     Франция (Лига 1) - 307,15 млн. евро

6.     Англия (чемпионшип) - 136,87 млн. евро

7.     Туркия (супер-лига) - 86,27 млн. евро

8.     Португалия (примеро) - 71,6 млн. евро

9.     Голландия (эредивизион) - 51,57 млн. евро

10.    Бельгия (юпилер-лига) - 36,65 млн. евро

11.    Германия (2-бундеслига) - 35,02 млн. евро

12.    Мексика (МХ лигаси) - 30,05 млн. евро

13.    С.Арабистони (премьер-лига) - 29,83 млн. евро

14.    Греция (супер-лига) - 27,41 млн. евро

15.    Италия («В» серияси) - 19,95 млн. евро

16.    Россия (премьер-лига) - 17,93 млн. евро