Футбол бўйича жаҳон чемпионати финали ўтказиладиган Россиянинг Санкт-Петербург шаҳрида жойлашган “Зенит-Арена” стадионига йилнинг ҳар қандай вақтида ушбу гумбаз ички қисмидаги ҳаво ҳароратини 21 даража атрофида ушлаб турувчи тизимни ўрнатиш ишлари ниҳоясига етказилди. Бу ҳақда журналистларга шаҳар қурилиши бўйича қўмита раиси Михаил Демиденко хабар берди.
“Биз 5 млн куб метр иситилган ҳавони тайёрлаш ва уни стадион гумбазига узатишга тайёрмиз. Мазкур жараённи таъминловчи энергетик марказ шай ҳолатга келтирилди”, – деди Михаил Демиденко.
Унинг қўшимча қилишича, айни пайтда ҳаракатланувчи том қисмларини йиғиш, ўриндиқларни ўрнатиш, 7 минг тонна оғирликдаги ғилдиракли футбол майдонини монтаж қилиш, ташқи муҳандислик тизимларига улаш ва ички пардозлаш ишлари олиб борилмоқда.
2006 йилда қурилиши бошланган объектнинг умумий қиймати 34,9 млрд рублни ташкил этиб, асосий қурилиш-монтаж ишлари 2016 йилнинг май ойида якунланиши белгиланган. Унда 68 минг томошабин футбол ўйинини кузатиши мумкин. Шунингдек, ғилдиракли футбол майдони олиб ташланса, бошқа маросимларда 80 минг нафаргача кишини ўз бағрига сиғдира олади.
2018 йилги футбол бўйича жаҳон чемпионати 14 июндан 15 июлгача Россиянинг 11 шаҳридаги 12 стадионда ўтказилади.
