Сайтимиз орқали аввалроқ хабар берганимиздек, Тошкент шаҳрида ЎФФнинг собиқ бош котиби Зокир Қурбонов хотирасига бағишлаб турнир ўтказилди. Турнирда вилоятимз шарафини “Насаф” ФМнинг 2003 йилда туғилган тарбияланувчиларидан иборат жамоаси ҳимоя қилди.
Бугун ушбу турнирнинг финал ва 3-ўрин учун баҳслари бўлиб ўтди. “Насаф-2003” жамоаси турнирнинг 3-ўрин учун баҳсида “Локомотив” клуби тарбияланувчилари жамоасига қарши майдонга тушди. Учрашувнинг асосий вақти 1:1 ҳисобида якунланди, вакилларимизнинг учрашувдаги киритган голига Зафармурод Абдураҳматов муаллифлик қилди.
Шундан сўнг мусобақа низомига кўра пенальтилар сериясига навбат берилди. Пенальтилар сериясида омад “Насаф-2003” жамоаси томонида бўлди. Бештадан пенальти тепган жамоалар ўйинчилари нишонда адашмадилар ва навбат қўшимча зарбаларга келди, бу сафар ёш футболчиларимиз мулжалда хато қилишмади, аксинча “Локомотив” клуби тарбияланувчилари қўшимча пенальтини ноаниқ ижро этишди. Умумий ҳисоб 6:5.
Шундай қилиб, “Насаф” ФМ тарбияланувчиларидан иборат ёш чарм тўп усталари уйга қуруқ қўл билан эмас, соврин билан қайтадиган бўлишди.
Фахриддин Чориев.
