ФИФАнинг аудит бўйича қўмитаси раҳбари Доменико Скала ташкилотда муайян ислоҳотларга қўл уриш лозимлигини таъкидлаяпти. Функ­ционернинг фикрича, у таклиф этаётган 8та қадам ФИФАнинг ҳозирги танг ҳолатдан чиқиб кетишига ёрдам беради. Бир қарашда, булар таклиф ҳам эмас, бажарилиши шарт бўлган талаблардек кўринмоқда.

1). ФИФА президенти ваколати муддатини 4 йиллик 3та муддатга қисқартириш.

Sovsport.ru сайти изоҳи: ФИФАнинг амалдаги раҳбари Йозеф Блаттер бу лавозимда 18 йилдан буён ишлаяпти. Тўғри, 2016 йили президентлик учун муддатидан олдин сайловлар ўтказилади.

2). Ижроқўм вакиллари, бош котиб, мустақил қўмиталар раҳбарлари, миллий федерациялар ва халқаро конфедерациялар президентларининг ўз лавозимларидаги ваколатларини 3та муддат билан чеклаш.

Sovsport.ru сайти изоҳи: ФИФАнинг ҳозирги бош котиби Жером Вальке бу лавозимда 2007 йилдан буён ишлаяпти. Жорий йилнинг июль ойида франциялик функционерни коррупцион можароларга дахлдорликда айблашди. Гумон қилинишича, Вальке можаронинг бош «фигура»си - Жек Уорнер ҳисоб рақамига 10 минг доллар ўтказиб берилишига ҳисса қўшган. Тахминларга кўра, бу маблағни ЖАР вакиллари ЖЧ-2010 мезбонлик ҳуқуқини қўлга киритиш учун пора сифатида беришган. Тўғри, айбловлар ҳали ўз тасдиғини топгани йўқ.

3). ФИФА раҳбарларига белгиланган маош ва уларнинг футбол фаолиятидан топадиган бошқа даромадлари миқдорини ошкор қилиш.

Sovsport.ru сайти изоҳи: айни пайт ФИФАдаги олий мартабали функционерлар оладиган маош миқдори тижорат сири ҳисобланади. Уларнинг қанча мояна эвазига ишлашларини ҳеч ким билмайди.

4). ФИФА ижроқўми структурасини икки қисмга ажратиш: маъмурий қўмита ва бошқарув кенгаши.

Sovsport.ru сайти изоҳи: ФИФА структураси айни пайт анча яхлитлик касб этади. Скала талабларининг моҳияти шуки, бошқарув бўйича маъмурий қўмита мустақил мутахассислардан ташкил топиши ва ФИФАнинг ҳар кунлик масалалари билан шуғулланиши керак. Бошқарув кенгаши эса, умумий назоратни ўз зиммасига олади.

5). Ўз навбатида, бошқарув кенгашини ҳам икки қисмга ажратиш - тижорат ва тараққиёт бўйича бўлим.

Sovsport.ru сайти изоҳи: Скаланинг фикрича, ФИФА фаолиятига боғлиқ ҳам спорт, ҳам молиявий масалаларни битта қўмита, яъни бир гуруҳ шахслар ҳал қилмасликлари лозим.

6). ФИФА Ижроий қўмитасидаги жойларни Конгрессда ошкора овоз бериш орқали тўлдириш.

Sovsport.ru сайти изоҳи: ҳозир ФИФА Ижроий қўмитаси халқаро конфедерациялар таклиф-тавсияларига биноан шакллантирилади.

7). Жаҳон чемпионати мезбонини танлаш ҳуқуқини Конгресснинг барча иштирокчилари ихтиёрига бериш.

Sovsport.ru сайти изоҳи:  ҳозирда ЖЧ мезбонини аниқлаш жараёнида фақат Ижроий қўмита аъзоларининг овозлари инобатга олинади.

8). Доимий қўмиталар ишидаги эффектлиликни ошириш, уларнинг мустақил фаолиятини кучайтириш, миллий федерациялар даражасида нисбатан юқори стандартларни белгилаш.

Sovsport.ru сайти изоҳи: Скаланинг айнан шу таклифи амалий нуқтаи назардан анча мавҳумдек кўринмоқда. Лекин ғоя аниқ-тиниқ - мустақил фаолият «коррупция» иборасига зарба бериши керак. Зеро, ислоҳотга айнан шунинг орқасидан эҳтиёж сезилмоқда