Футбол бўйича XXIV миллий чемпионатимиз ҳам секин-аста ҳал қилувчи паллага кириб бормоқда.
Ҳозирга келиб жамоалар Олий Лигада 24 тадан учрашув ўтказишга улгуришди. “Пахтакор” ҳамда “Локомотив” чемпионлик учун жиддий кураш олиб боришаётган бўлса, “Насаф” бронза медалларни деярли ўзиники қилиб улгурди. “Нефтчи” ва “Бунёдкор” эса “кучли тўртлик”дан жой олиш учун ўзаро “жанг” бошлашган. Хуллас, совринли ўринлар учун кураш айни авжига чиқиб улгурди.
Аммо манашу юқори ўринлар учун ҳаракат қилаётган жамоалар рақобати “сояси“да элитада жон сақлаб қолишга уринаётганлар кураши қолиб кетмоқда, десак асло муболаға бўлмаса керак. Зеро сўнгги пайтларда қайси клубнинг чемпионат олтин медалларига эга чиқиши жуда кўп ва хўп муҳокамаларга сабаб бўлмоқда. Лекин Олий Лигада ”Динамо”, “Сўғдиёна”, “Андижон” ёки “Бухоро” клубларидан қайси бири қолиши ва улардан қайсилари элитани тарк этишлари масаласи бироз унутилгандек, гўё…
Шуни инобатга олиб, элитани тарк этиш хавф солиб турган клубларнинг ҳозирги ҳолати ҳамда уларнинг қолган 6 та турда қайси жамоаларга қарши баҳс олиб боришларидан келиб чиққан ҳолда, бу жамоаларнинг Олий Лигада қолиш имкониятларини чамалаб чиқсак…
Бугунги кунга келиб, ”Динамо” (21 очко), “Сўғдиёна (20 очко)”, “Андижон” (18 очко) ва “Бухоро” (16 очко) клублари Олий Лига мусобақа жадвалининг энг пастдаги 4 та ўрнига жойлашишган. Улардан олдинда турган “Қўқон-1912” ҳисобида эса 24 очко мавжуд ва кўпчилик қўқонликларнинг элитада қолишларига ишонмоқда. Балким бунга “Қўқон-1912”нинг муқобил ўйин кўрсатмаётган бўлса ҳам зарур пайти очколар йиға билаётгани сабабдир… Хуллас, Олий Лигада қолиш учун кураш асосан 4 та клуб ўртасида кечиши барча томонидан таъкидланмоқда.
Энди эса ушбу жамоаларнинг ҳар бирига алоҳида тўхталиб ўтсак:
Динамо
Самарқанднинг “Динамо” жамоаси жорий йилги мавсумни жуда беқарор тарзда ўтказмоқда. Самарқандликлар 24-турдан сўнг 6 та ғалаба, 3 та дуранг ҳамда 15 та мағлубият билан 21 очко тўплаган ҳолда мусобақа жадвалининг 13-ўрнида боришмоқда. Бу ҳол жамоанинг ашаддий ишқибозларига хуш ёқаётгани йўқ, албатта. Мухлислар ўз севимли жамоаларидан чиройли ўйин ва ғалабалар кутишмоқда.
Лекин “Динамо” чемпионат тугашига оз вақт қолди ҳамки, ҳамон бир маъромга тушиб олганича йўқ. Ким билади, “Динамо” бу йил “ўзига келиш”га улгурармикан ёки бунга улгурмасдан, Биринчи Лигага равона бўладими… Зеро “Динамо”ни олдинда оддий учрашувлар кутаётгани йўқ. Самарқандликлар келгуси турларда “Бунёдкор”, “Пахтакор” ҳамда “Насаф” жамоаларига қарши тўқнаш келади. Агар “ Динамо” грандлардан очко ола билса, элитада қолиш учун умид қилса бўлади. Кўрамиз, Самарқанд жамоаси бу вазифани уддалай олармикан.
“Динамо”нинг навбатдаги турлардаги ўйинлари:
Динамо – Бунёдкор (25-тур)
Машъал – Динамо (26-тур)
Пахтакор – Динамо (27-тур)
Динамо – Насаф (28-тур)
Андижон – Динамо (29-тур)
Динамо – Олмалиқ (30-тур)
Сўғдиёна
Жиззахнинг “Сўғдиёна” клуби учун ҳам 2015 йилги мавсум омадли тарзда ўтмаяпти. Жиззахликлар ҳеч ҳам барқарор ўйин намойиш эта олишмаяпти. Ҳозирда мусобақа жадвалида 20 очко жамғарганча, 14-поғонани эгаллаб турган “Сўғдиёна” баъзида жуда ажойиб ўйнамоқда ва мухлисларини хушнуд этмоқда. Баъзан эса кутилмаганда жуда йирик ҳисобларда ҳам мағлубиятга учрамоқда.
Буни жамоа устози Даврон Файзиев таркибда ёшларнинг кўп экани билан боғлади. Бу гапга қўшилса бўлади. Зеро Файзиев Жиззахда ёшлардан иборат яхшигина жамоа туза олмоқда. Фақат бу меҳнат ўз самарасини бериши учун бироз вақт талаб этилади. “Сўғдиёна”нинг бир нечта футболчилари айни дамга келиб, олимпия терма жамоасига жалб этила бошланди. Буни катта плюс дейиш мумкин. Аммо бу ёшлар бир-бирларини яхши тушуниб етгунича яна 1-2 мавсум талаб этилади. Бунга клуб мутасаддиларининг сабри етармикан…
“Сўғдиёна”нинг навбатдаги турлардаги ўйинлари:
Пахтакор – Сўғдиёна (25-тур)
Сўғдиёна – Насаф (26-тур)
Андижон – Сўғдиёна (27-тур)
Сўғдиёна – Олмалиқ (28-тур)
Қўқон-1912 – Сўғдиёна (29-тур)
Сўғдиёна – Бухоро (30-тур)
Андижон
“Андижон” жамоаси қайд этаётган натижалар мана икки мавсумдирки клуб ишқибозларини ранжитиб келмоқда. Аслида “Андижон” ўтган мавсумдаёқ ислоҳотларга муҳтож эканини кўргандик. Лекин бу клубга имкон берилди. Бироқ “Андижон” жамоаси қайд этаётган натижалар клуб ҳамон “кичик инқироз”ни бошдан кечираётганини кўрсатиб турибди. Мазкур жамоа 24-турдан сўнг 18 очко билан мусобақа жадвали 15-ўринига жойлашган. “Андижон”5 марта ғалабага эришиб, 3 та дуранг ўйнагани ҳамда 16 бор мағлубиятга учрагани ушбу жамоа учун мавсум жуда омадсиз ўтаётганидан далолат бериб турибди.
Кўплаб мухлис ва мутахассислар айнан “Андижон”нинг Олий Лигада қолиш масаласи анча қийин эканини таъкидлашмоқда. Зеро андижонликлар навбатдаги турларда “Нефтчи”, “Бунёдкор” ва “Пахтакор” жамоаларига қарши баҳс олиб боришларига тўғри келади. Аммо футболда ҳар қандай воқеа юз бериши мумкин эканини ҳам унутмаслигимиз мумкин. Балки, “Андижон” сўнгги турларда “уйғонар” ва грандлардан очко олиб, элитада қолиш имконига эга бўлар…
“Андижон”нинг навбатдаги турлардаги ўйинлари:
Андижон – Металлург (25-тур)
Нефтчи – Андижон (26-тур)
Андижон – Сўғдиёна (27-тур)
Бунёдкор – Андижон (28-тур)
Андижон – Динамо (29-тур)
Пахтакор – Андижон (30-тур)
Бухоро
Жорий мавсумда энг кўп танқидларга учраган жамоа “Бухоро” бўлди, десак хато бўлмас. Зеро таркибда бир қатортажрибали ва маҳоратли ижрочиларга эга бўла туриб, азим шаҳар жамоаси негадир нурсиз ўйнамоқда. “Бухоро”нингмуваффақиятсиз ўйини жамоа қайд этаётган натижаларда ўз аксини топмоқда. “Бухоро” мусобақа жадвалида анчавақтдан буён охирги ўринни ҳеч кимга бермай келмоқда.
Бундай муваффақиятсизликлар жамоа раҳбариятига ва мухлисларига маъқул тушмагач, жамоа бош мураббийниалмаштирди ва бир қатор янги футболчилар харид қилинди. Бу ўзгаришлар секин-аста ўз самарасини бера бошлади. Аммо“Бухоро”га кўпроқ ғалаблар қозониб, очколар қўлга киритишга вақт етармикан. Бунисини энди чемпионат якунида бирилиб оламиз…
“Бухоро”нинг навбатдаги турлардаги ўйинлари:
Бухоро – Шўртан (25-тур)
Локомотив – Бухоро (26-тур)
Бухоро – Навбахор (27-тур)
Металлург – Бухоро (28-тур)
Бухоро – Нефтчи (29-тур)
Сўғдиёна – Бухоро (30-тур)
Гувоҳи бўлаётганингиздек, элитада жон сақлаб қолиш учун кураш айни шу тўрт клуб ўртасида кечади. Уларнинг қай бири қолган турларда муҳим очколарни йиға олса, ўша Олий Лигада келаси йили ҳам ўйнайди. Йўқса, биз бу клублардан иккитаси билан хайрлашишимизга тўғри келади…
