22 октябрь куни Европа Лигаси гуруҳ босқичининг 3-тур ўйинлари бўлиб ўтди ва унда Ўзбекистон миллий терма жамоаси аъзолари ҳам иштирок этди.
Ўзбекистон миллий терма жамоаси ярим ҳимоячиси Одил Аҳмедов фаолият олиб борадиган Россиянинг “Краснодар” клуби Грециянинг ПАОК жамоаси майдонига сафар қилиб, дуранг натижа қайд этди. Учрашувда ҳисоб очилмади ва жамоаларнинг ҳар бири очколари сонини биттага ошириб олди. Аҳмедов учрашувда 65 дақиқа давомида ҳаракат қилди.
“Краснодар” ушбу дурангдан кейин 4 очко билан гуруҳда иккинчи ўринда бормоқда. “С” гуруҳи пешқадами эса Дортмунднинг “Боруссия” жамоаси. Немис жамоаси ҳисобида 7 очко бор.
Москванинг “Локомотив” клубида фаолият олиб бораётган Виталий Денисов эса жамоасининг “Бешиктош”га қарши учрашувида майдонга тушиб, ўйини тўлиқ ўтказди. “Локомотив” турк жамоаси билан ўйинда 1:1 ҳисобида дуранг ўйнади. Ўтказилган 3 ўйиндан кейин Москва жамоаси ҳисобида 7 очко бор ва улар гуруҳда биринчи ўринни эгаллаб турибди.
Европа Лигаси гуруҳ босқичининг навбатдаги тур ўйинлари 5 ноябрь куни бўлиб ўтади.
