Франциянинг “Лион” жамоаси аъзоси Матьё Вальбуэна ўзининг шантаж қилиниши билан боғлиқ равишда қўзғатилган иш юзасидан кўрсатма бериш учун 20 ноябрь куни судга чақирилди. Бу ҳақда I Tele канали хабар берди.
Айтилишича, Вальбуэна Франция термаси бўйича жамоадоши Карим Бензема билан бўлиб ўтган суҳбати хусусида батафсил маълумот бериши керак бўлади.
Чоршанба куни Бензема Вальбуэнадан шантаж йўли билан пул ундиришда айбланиб ҳибсга олинган эди.
Тергов маълумотларига қараганда, бир гуруҳ фирибгарлар Вальбуэнанинг шахсий видеоларини оммалаштириш билан қўрқитиб, ундан пул ундиришга ҳаракат қилган. Бу гуруҳда Карим Бензема ҳам бўлгани гумон қилинмоқда.
Айтилишича, видео дастлаб Бенземанинг телефонида бўлган, ундан эса футболчиларга хизмат кўрсатувчи хусусий фирмалардан бирининг вакили қўлига тушиб қолган. Айнан ўша одам Вальбуэнани шантаж қила бошлагани тахмин қилинмоқда.
