Маълумки, кўпчилик футбол ишқибозлари ҳалиям дунёнинг энг катта стадиони деб Бразилиядаги «Маракана» аренасини ҳисоблашади. Лекин аслида бундай эмас. Тўғри, «Маракана» ҳам ўз вақтида рекордчи-стадион бўлган, лекин ҳозирга келиб шароит ўзгарди. Аниқроғи, «Маракана» айни пайтда ўз бағрига 73 531 томошабинни сиғдиролади, холос. 1950 йилги мундиалнинг Бразилия ва Уругвай терма жамоалари ўртасидаги финал ўйинини бу стадионда 199 минг 854 нафар инсон кузатган. Шундай қилиб, ҳозирда бу машҳур арена сиғими бўйича ҳатто топ-50талик рўйхатга ҳам кирмайди. Келинг, яхшиси, бугунги энг йирик ареналар билан танишайлик...
Ohio Stadium «The Horseshoe»
Қаерда жойлашган: АҚШ; Огайо штати; Колумбус.
Жамоа: университетнинг Ohio State Buckeyes номли америкача футбол клуби.
Сиғими: 104 944.
Огайо Стэдиум катталиги жиҳатидан АҚШда бешинчи, дунё миқёсида эса еттинчи ўринда туради. Стадион Колумбус шаҳридаги Огайо университети ҳудудида жойлашган. Аренанинг очилиш маросими 1922 йилнинг 7 октябрида бўлиб ўтган. Ўшандан бери ўйингоҳ 4 марта капитал таъмирлашдан чиқди. Ташқи кўриниши туфайли «Тақа» номи билан танилган бу стадион ўз бағрига 104 944 томошабинни сиғдира олади. Аренанинг асосий хўжайини - Огайо Стэйт Бакайс (Ohio State Buckeyes) футбол жамоаси. Қизиғи шундаки, бу стадион ёритиш тизими билан жиҳозланмаган. Шунинг учун куннинг қоронғу вақтида ўтадиган тадбирлар вақтида вақтинчалик ёритиш ускуналаридан фойдаланилади.
AT&T Stadium «Cowboys Stadium»
Қаерда жойлашган: АҚШ; Техас штат; Арлингтон.
Жамоа: Dallas Cowboys (NFL)
Сиғими: 105 000.
АТ&Т Стэдиум, бошқача айтганда, «Ковбойс Стэдиум» сиғими бўйича Техасда иккинчи, АҚШда эса 4-ўринда. Стадион 2009 йил 27 майда фойдаланишга топширилган. Иншоотни барпо қилишга 1,3 миллиард доллар сарфланган. Аренада асосан «Даллас Ковбойс» (Dallas Cowboys) клуби уй учрашувларини ўтказади. АТ&Т Стэдиумда шунингдек, турли гала-концертлар, NBA, MLS ва ҳатто, мотопойга мусобақалари ўтказилади. Чунки ўйингоҳнинг сиғими ажойиб - 105 000 томошабин.
Azteca
Қаерда жойлашган: Мексика; Мехико
Жамоа: футбол бўйича Мексика терма жамоасининг уй ўйингоҳи.
Сиғими: 105 064.
Бу стадион Мексика пойтахти Мехикода 1966 йили қад ростлаган. Шундан бери иншоот икки марта мундиалга мезбонлик қилди (1970, 1986). Энг муҳими, «Ацтека» 1986 йилнинг 22 июнида аргентиналик афсона Диего Марадона қандай қилиб, «Илоҳий қўл» билан гол урганига гувоҳ бўлди.
Beaver Stadium
Қаерда жойлашган: АҚШ; Пенсильвания штати; Юниверсити-Парк
Жамоа: университетнинг Penn State Nittany Lions номли америкача футбол клуби ўйингоҳи.
Сиғими: 106 572.
Бивер Стэдиум 1960 йил қурилиб битказилган ва у сиғими борасида АҚШда иккинчи, дунёда 4-ўринда туради. Юниверсити-Парк шаҳридаги бу иншоотда Найттэни Лайонс (Penn State Nittany Lions) клубининг уй учрашувлари ўтказилади. Стадион жами 106 572 нафар томошабинга мўлжалланган бўлиб, унинг номидаги «Бобер» сўзи «юмронқозиқ» маъносини англатмайди. Гап шундаки, ўйингоҳ штатнинг собиқ губернатори Жеймс А. Бивер шарафига номланади.
Michigan Stadium
Қаерда жойлашган: АҚШ; Мичиган штати; Энн-Арбор.
Жамоа: Мичиган университетининг америкача футбол бўйича Michigan Wolverines номли клуби стадиони.
Сиғими: 109 901.
Мичиган Стэдиум - АҚШдаги, Шимолий Америкадаги ва умуман, /арбий яримшардаги энг катта стадион. Дунёда америкача футбол учун қурилган бундан катта иншоотни топа олмайсиз. Мазкур гигант 1927 йили барпо этилган бўлиб, ўшанда унинг сиғими 72 минг томошабинга мўлжалланганди. Ҳозирда эса «Катта уй» деб аталадиган Мичигандаги стадион ўз бағрига 109 901 кишини сиғдиради. Эҳтиёж туғилганда эса сиғим 116 000 нафарга ўзгариши ҳам мумкин. 2013 йили 7 сентябрда маҳаллий «Мичиган Вулверинз» ва «Нотр-Дам Файтин Айриш» жамоалари ўртасидаги учрашувни 115 109 киши бевосита стадионда томоша қилган.
Қизиқ ҳолат: Энн-Арбор шаҳрининг жами аҳолиси 110 000 киши. Демак, футбол вақтида ўйингоҳга шаҳар аҳолисидан ҳам кўпроқ одам йиғилади.
Salt Lake Stadium
Қаерда жойлашган: Ҳиндистон; Калькутта
Жамоа: Ҳиндистон терма жамоасининг уй ўйингоҳи.
Сиғими: 120 000.
Стадион 1984 йили Ҳиндистоннинг Калькутта шаҳрида қад ростлаган. Бу ўйингоҳда Ҳиндистон терма жамоаси рақибларини қабул қилади. Шунингдек, «Ист-Бенгал», «Мохун Баган» ва «Мохаммедан» клублари ҳам ўйинларини худди шу стадионда ўтказишади.
Айтганча, бу ерда енгил атлетика мусобақаларини ҳам ўтказиш мумкин.
«Биринчи Май» стадиони
Қаерда жойлашган: КХДР; Пхеньян
Жамоа: КХДР терма жамоасининг стадиони.
Сиғими: 150 000.
Пхеньяндаги Ниннадо оролида жойлашган бу стадион дунёдаги энг катта арена ҳисобланади. 150 000 томошабинга мўлжалланган бу иншооот 1989 йили фойдаланишга топширилган бўлиб, ёшлар ва талабаларнинг XIII фестивалига мўлжалланган эди. «Биринчи май стадиони»нинг конструкцияси шундай ғаройибки, унинг устини ёпиб турувчи 16 эгик ёпқич бирлашиб, ҳалқа шаклини олади. Бу ҳалқа эса юқоридан қаралса магнолия гулини эслатади.
Хуллас, дунёдаги энг катта ареналарнинг иккитаси футбол юрти ҳисобланмайдиган мамлакатларда бунёд қилинган. Биз эса сиз билан ЖЧ-2018ни кутиб қоламиз. Эҳтимол, мазкур рўйхат ўзгарар...
