Узоқ йиллик танаффусдан сўнг кучлилар сафига қайтган “Қўқон-1912” жамоаси Олий Лигадаги дебют мавсумда 12-ўринни қўлга киритганидан хабарингиз бор.
Бугун “Қўқон-1912” жамоаси янги бош мураббий – Муроджон Исмоиловни оммага таништирди. Мазкур таништирув маросимида клуб вице-президенти Бахтиёр Толипов сўзга чиқиб, жамоанинг кейинги режалари хусусида тўхталиб ўтди.
- Мана қарийиб бир ойдан бери “Қўқон-1912” жамоасига ким бош мураббий бўлиши борасидаги савол кўндаланг турганди. Ниҳоят, икки кун олдин бу масалага ойдинлик киритилди. Жамоамизга Муроджон Исмоилов бош мураббий этиб тайинланди. Янги мавсумга тайёргарликни 17 декабрдан бошлаймиз. 28 декабрь куни катта тадбир ўтказиш режалаштирилган. Айнан шу куни кўп саволларга жавоб топилади, - дея Толиповнинг сўзларидан иқтибос келтирмоқда клуб расмий сайти.
Таъкидлаш жоиз, “Қўқон-1912” жамоаси футболчиларига “Бунёдкор”га қарши кечган Олий Лига-2015 сўнгги тур учрашувидан сўнг таътил берилганди. Маълум бўлишича, қўқонликлар янги мавсумга тайёргарликни 17 декабрдан бошлашади.
