Ортда қолган мавсумда 23та гол билан Олий Лига тўпурарига айланган иқтидорли ҳужумчи Игорь Сергеев фаолиятини Япония чемпионатида давом эттириши мумкин.

Маълум бўлишича, “Пахтакор” ҳужумчиси хизматларига “кунчиқар юрт” чемпиони – “Санфречче Хиросима” қизиқиш билдираётган экан. Бу ҳақда сўнгги кунларда championat.asia манбасига таянган ҳолда бир қатор япон нашлари маълумот тарқатмоқда. “Санфречче” Сергеевнинг трансферини тўлалигича сотиб олмайди, балки уни бир мавсумга ижарага олади. Агар миллий терма жамоамиз аъзоси япон клубига кўчиб ўтадиган бўлса, у “J-Liga”да ўйнаган иккинчи ўзбекистонлик футболчига айланади. Илгари Ўзбекистон миллий терма жамоаси шарафини ҳимоя қилган собиқ ҳимоячи Олег Пашинин ҳам айнан “Санфречче Хиросима” таркибида тўп сурганди.

Таъкидлаш жоиз, ортда қолаётган йилда жами 50 та учрашувда иштирок этиб, 32 марта рақиблар дарвозасини ишғол қилган Игорь Сергеевнинг “Санфречче Хиросима” таркибига кўчиб ўтиши ҳали расман ўз тасдиқини топгани йўқ. Чунки “Пахтакор” бу борада ҳали расмий баёнот бермади.