Furkat.uz: Олдинроқ қорақалпоқ футболи тарбияланувчиси Саламат Қуттибоевнинг Олий лига-2015даги кўрсаткичларини эътиборингизга ҳавола этган эдик. Бу сафар Наврўзбек Алимов ҳақида тўхталамиз.

23 ёшли ҳужумчи Олий лиганинг биринчи даврасида “Пахтакор” жамоаси таркибида тўп сурди. Бироқ Алимов “шерлар”нинг асосий футболчиларидан бирига айлана олгани йўқ. У биринчи даврада бор йўғи 2 учрашувда жами 15 дақиқа ҳаракатланиб, биттадан сариқ ва қизил карточка ишлаб олди.

Наврўз иккинчи даврани яна жонажон клуби “Қизилқум”да ўтказди. У эски жамоасига тезда киришиб кета олди. 17-турда “Бунёдкор”га қарши баҳснинг 17 дақиқасида ҳисобни тенглаштиришга муваффақ бўлди. Бироқ шу куни Элдор Шомуродовнинг “дубл”и “қалдирғочлар”га ғалабани туҳфа этди. Алимов орадан 4 тур ўтгач “Андижон”га қарши ўйинда ўз ҳисобига гол ёздириб қўя олди. Бироқ бу сафар ҳам унинг жамоаси имкониятни бой берди.

Алимов чемпионатдаги 3 голини 26-труда Ғузорда киритди. Шу куни навоийликлар 3:1 ҳисобида зафар қучишди. Наврўз эса 90 дақиқада гол урди. Бу унинг мавсумдаги охирги голи эди. У “Қизилқум” таркибида 14 ўйинда 934 дақиқа майдонда ҳаракат қилиб 3 та гол урди. Шунингдек у 3 марта ҳакамлар томонидан огоҳлантирилди.

Фактлар
1. Алимов 3 та голини ҳам сафар ўйинларида киритган.
2. Голларининг бирини биринчи, иккитаси эса иккинчи бўлимларда урган.

Фурқат Юсупов тайёрлади
Манба: www.Furkat.uz