Швейцариянинг «Цюрих» клубининг янги футболчиси россиялик Александр Кержаков янги жамоаси сафида 72-рақамда тўп сурадиган бўлди. Бу ҳақда ТАСС нашри клуб президенти Анчилло Канепа берган маълумотга таяниб хабар тарқатди.
Манбага кўра, Кержаков бу рақамни Миллий хоккей лигасининг «Чикаго Блэкхоукс» жамоасида ўйновчи дўсти Артемий Панарин шарафига олган. Панарин айнан шу рақам остида ҳаракат қилади.
«Кержаков ўзининг 11-рақамини олишни истаганди. Бироқ бу рақам Албания терма жамоаси аъзоси Армандо Садику томонидан банд қилинганди. Шунда у хоккейчи дўсти шарафига 72- рақамни олишга қарор қилди», — дейди Канепа.
Эслатиб ўтамиз, Кержаков «Цюрих»га ижара асосида ўтган. Унинг «Зенит» билан амалдаги шартномаси 2016 йилнинг 30 июнида тугайди.
