Доҳадан дараклар. Ироқ терма жамоаси бош мураббийининг айтишича, улар шанба куни Ўзбекистонга қарши учрашувда чорак финал йўлланмасини нақд қилишмоқчи.

ОФК расмий сайтининг ёзишича, ироқликлар “С” гуруҳининг дастлабки ўйинида Яман устидан қозонилган ғалабадан сўнг улар бу босқични юқори нотада якунлашни мақсад қилишган.

Кейинги баҳсда шанба куни Ироқ олимпиячилари Seheim Bin Hamad Stediumда Ўзбекистонга қарши беллашувда майдонга тушишса, сешанбада Жанубий Корея билан кураш олиб боришади.

Ироқ терма жамоаси бош мураббий Ўзбекистон ҳақида ўз фикрларини билдириб ўтди.

- Биз Жанубий Корея билан тўқнаш келишимиздан олдин, чорак финал йўлланмасини қўлга киритишимиз керак. Ўзбекистонга қарши учрашув жуда муҳим. Улар жуда кучли жамоа ҳисобланишади. Ўзбекистон олимпиячилари таркибида Осиёнинг энг яхши ёш футболчиси Достонбек Ҳамдамов ҳаракат қилади. Шу боис, навбатдаги баҳс осон кечмайди.

Шунингдек, Ироқ олимпия терма жамоаси устози олдинги беллашув ҳақида ҳам тўхталиб ўтди.

- Биз Яманга қарши учрашувда энг яхши ўйинимизни намойиш эта олмадик. Ўша беллашувда бир нечта хатоларга йўл қўйлдик ва уларни тузатишда давом этамиз. Аммо кейинги баҳсга ўзимизнинг режаларимиз бор. Бўлажак ўйинга шогирдларим тайёрлар. Бу беллашув Олимпиада йўлланмасини тақдим этади. Бу катта нарса. Бироқ таркибимиздаги иқтидорли футболчилар билан бу йўлланмани қўлга киритишимизга умид қиламиз, - дейди Абдул Ғани Шаҳад.