«Барселона»нинг аргентиналик футболчиси Лионель Месси унинг футболкасини полиэтилен пакетдан ясаб олган ироқлик болага ёрдам беришни истамоқда.
Бироз олдинроқ, туркиялик интернет фойдаланувчилари полиэтилен пакетдан Аргентина термаси формасини эслатувчи рангларга эга футболка ясаб, кийиб олган ироқлик бола суратини тарқатишганди. Суратда Даҳук шаҳрида яшовчи бола орқа томонидан кўрсатилган, бу сурат тезда интернетда тарқалиб кетганди.
Твиттер ижтимоий тармоғи фойдаланувчилари Мессининг ҳақиқий футболкасини совға қилиш учун, уни қидириш бўйича кампания бошлаган.
Bleacher Report нашрии хабарига кўра, ушбу флешмоб ҳақида Месси ҳам хабар топди ва болага ёрдам бериш истагини билдирди. Аммо ушбу болакайни топиш қийин бўлиши айтилмоқда.
