28 январь куни Мельбурн шаҳрида давом этаётган “Катта Дубулға” туркумига кирувчи Австралия Очиқ чемпионатининг ўсмирлар ўртасидаги мусобақасида Ўзбекистон вакили Жўрабек Каримов ярим финалга йўлланма олди.

Турнирда еттинчи рақам остида таснифланган Жўрабек чорак финал баҳсида япониялик Йосуки Ватанукини 6:3, 6:2 ҳисобида таслим этди. Бу ҳақда olamsport.com хабар берган.

Турнирда 13-рақам остида таснифланган япон теннисчиси учинчи даврада мусобақанинг иккинчи ракеткаси сербиялик Миомир Кезмановични баҳслардан чиқариб юборганди.

Жўрабек Каримовнинг ярим финалдаги рақиби австралиялик Алекс Де Минаур бўлади. Мусобақада олтинчи рақам остида ҳаракат қилаётган Минаур чорак финалда турнирнинг учинчи ракеткаси грециялик Стефанос Циципасни 6:7, 7:5, 6:0 ҳисобида мағлуб этди.

Эслатиб ўтамиз, Жўрабек Каримов илк даврада АҚШ вакили Эзикел Кларкни 6:1, 6:3, иккинчи босқичда гонконглик Энтони Тангни 6:4, 6:4, учинчи даврада эса кореялик Чанг-Ён Охни 6:4, 6:2 ҳисобида доғда қолдирган эди.

Маълумот учун, Жўрабек Каримов ўтган йилги Австралия Очиқ чемпионатида ҳам ярим финалга қадар етиб келганди.