Хабар берганимиздек, кеча Қатар Юлдузлар Лигасида 16-тур учрашувлари якунига етди. Мазкур тур доирасидан ўрин олган беллашувларда ҳамюртларимиз тўп сураётган ҳар икки жамоа ҳам мағлубиятга учради.

Ўзбекистон терма жамоаси етакчиларидан бири саналадиган Сардор Рашидов ҳаракат қилаётган “Ал-Жаиш” клуби бу турда “Ал-Хор” жамоаси меҳмони бўлди ва кутилмаганда кичик ҳисобда имкониятни бой бериб қўйди.

Тур доирасидан ўрин олган яна бир қизиқарли ўтган баҳсда эса мусобақа жадвали карвонбошиси “Ар-Райян” ўзбекистонлик ярим ҳимоячи Санжар Турсунов яқинда кўчиб ўтган “Умм Салал”ни икки тўп фарқи билан мағлуб этди.

Биз эса Сардор Рашидовнинг мазкур турда қайд этилган натижалар ва Санжар Турсуновнинг Қатар Юлдузлар Лигасига кўчиб ўтиши борасидаги фикрлари билан қизиқдик.

- “Ал Хор”га қарши кечган ўйин биз учун осон ўтмади. Боиси тўп билан муомала қилиш ва ҳужумлар уюштириш борасида устунлик қилган бўлсак-да рақиб дарвозасини ишғол этиш бобида омадимиз чопмади. Рақиб эса асосан қарши ҳужумларга таянган ҳолда ўйнади ва шундай ҳужумлардан бирини гол билан якунлаб, якунда муҳим 3 очкога эга чиқди.

Санжар Турсуновнинг “Умм Салал”га кўчиб ўтганидан эса рости жуда қувондим. Кечаги ўйинда ушбу жамоага мухлислик ҳам қилдим. Лекин “Умм Салал”га “Ар-Райян” билан ўйинда омад етишмади. Қатарда жамоалар ўртасида рақобат анча кучли. Шу сабабли ҳам бирор ўйинда қайси жамоанинг ғолиб чиқишини олдиндан айтиш қийин, - дейди маҳоратли ярим ҳимоячи.

Таъкидлаш жоиз, энди Юлдузлар Лигасида навбатдаги тур ўйинлари 4-6 февраль кунлари ўтказилади. “Ал-Жаиш” ўз уйида “Ал-Харайтият”ни қабул қилса, Санжар Турсуновнинг “Умм Салал”и 5 февралда “Қатар СК” билан баҳс юритади.