Халқаро футбол федерацияси (ФИФА) молия соҳасида ислоҳот ўтказиш бўйича ташкилот раҳбарлигига номзодлар томонидан тақдим этилаётган таклифлар ташкилотни 2018 йилда банкротга учрашига сабаб бўлиши мумкин. Ушбу фикрларни ФИФА президентлигига номзод шайх Салмон бин Иброҳим ал-Халифа Insideworldfootball.com порталига берган интервьюсида айтиб ўтди.
“Сўнгги молиявий йил давомида ФИФА кўрсаткичлари сезиларли даражада ёмонлашди, – деди Салмон. – Бу қайғули манзара. 2018 йилда ФИФА ўз молия захираларини сарфлаб юборади, агарда вазият ўнгланмаса, маркетинг ва телевизион ҳуқуқларни сотишдан олинаётган пуллар бизга етмайди. Рақибларимнинг таклифлари ФИФА харажатларини кейинги тўрт йил ичида миллиард долларга оширади”.
Унинг сўзларига кўра, бу каби дастурлар амалга оширилса, ташкилот ФИФАнинг охирги йилдаги 100 миллион долларлик камомадини ҳисобга олсак, жуда оғир вазиятга тушиб қолади. У ўз режаси ташкилотни банкротга олиб бормаслиги, аксинча, уни қайта қуриши ва жонлантиришини иддао қилмоқда.
ФИФА президентлигига шайх Салмондан ташқари ЖАРнинг собиқ турар-жой қурилиши вазири Токио Сексвале, ФИФА бош котибининг собиқ ўринбосари Жером Шампань (Франция), Европа футбол ассоциацияси кенгаши (УЕФА) бош котиби Жанни Инфантино ва Иордания шаҳзодаси Али бин ал-Ҳусайн ҳам ўз номзодини илгари сурган. ФИФА президенти тўрт йил муддатга сайланади. Амалдаги президент Йозеф Блаттер 2015 йилнинг 29 майида ташкилот конгрессида навбатдаги муддатга қайта сайланган эди. Бироқ орадан тўрт кун ўтганидан сўнг порахўрликда айбланганидан сўнг истеъфога чиқиш ҳақида эълон қилди. Янги президентлик сайлови 26 февраль куни бўлиб ўтади.
