Санжар Қодирқулов мухлисларнинг кенг оммасига унча таниш бўлмаслиги мумкин, аммо биринчи лига ўйинларини кузатиб борадиганлар уни жуда яхши биладилар. Асли «Бунёдкор» тарбияланувчиси саналган Санжар ўтган мавсум «Обод» шарафини ҳимоя қилди (ижара асосида) ва жамоасига олий лига йўлланмасини қўлга киритишда катта ёрдам берди. Мана, 18 ёшли ҳужумчининг самарадорлиги «Бунёдкор» мураббийлар штабини бефарқ қолдирмади ва у мавсумлар оралиғида «қалдирғочлар» сафига қайтди. Асосийси, Санжар тайёргарлик йиғинларида ўзини кўрсатиб, мураббийлар ишончига кирди. «Бунёдкор»нинг янги мавсум олдидан уютирган тақдимот маросимидан сўнг ёш ҳужумчини суҳбатга тортиб, унинг яқин режалари билан қизиқдик.
- Санжар, аввало, қадрдон клубингиз сафига қайтганингиз билан табриклаймиз. Ўтган мавсум ижара асосида «Обод»га кетар экансиз, шундай бўлишини ўйлаганмидингиз?
- Ҳа. Зеро, «Бунёдкор»га яна қайтишимни ўшандаёқ жуда яхши билганман. Чунки кетиш олдидан клубдагилар билан алоҳида гаплашгандик. Хусусан, менга агар ўзимни кўрсата олсам, жамоага чақиришларини айтгандилар. Шундай қилиб, «Обод»да катта куч билан ишладим, бор имкониятимдан фойдаланишга интилдим. Насиб экан, мана, яна «Бунёдкор»даман. Мавсумолди тайёргарлиги давомида мураббийлар ишончи бежиз эмаслигини исботлашга ҳаракат қилдим.
- Клубдаги рақобатдан чўчимайсизми? Ҳар ҳолда, ҳали ёшсиз, «Бунёдкор»да эса кўпни кўрган футболчилар бор...
- Рақобатдан қўрққан спортчи ҳеч нарсага эришолмайди. Агар энг яхшилардан эканимни исботлай олмасам, футболда нима қиламан? Футбол ва рақобат ҳар доим ёнма-ён юради. Албатта, ўз ўйиним билан мураббийлар ишончини қозонишни хоҳлайман. Клубда ёш футболчиларга эътибор катта эканлиги фойдамга ишласа, ажабмас. Ўзи 12 ёшимдан буён «Бунёдкор»даман. Шу клуб сафида ўзимни кўрсатиб, танилишни истайман. Бунинг учун менга етарлича имконият беришларига ишонаман.
- Клубга қайтганингиздан сўнг Бахтиёр Бобоев билан алоҳида гаплашиб олдингизми? У сизга нималар деди?
- Ҳозирча бафуржа гаплашганимизча йўқ. Аммо мавсумолди йиғинлари вақти менга яхши эътибор қаратишди, керакли кўрсатмалар бериб туришди. Хуллас, клуб ишонч билдирмоқда ва бундан ғоят хурсандман. Ҳозир мендан талаб қилинадиган ягона нарса - ишлаш.
- Клуб ёшларга ҳар қанча эътибор қаратмасин, 18 ёшли футболчининг кўп нарсага умид қилиши қийин. Қизиқ, янги мавсумда нечта ўйинда майдонга тушишни режалаштиряпсиз?
- Мен фақат ўз меҳнатимга умид қиламан. Агар машғулотларда яхши ишласам, албатта, майдонга туширишади.
- Хусусан, сизга асосий таркибда жой беришларига ишонасизми?
- Ҳа. Албатта, ҳар бир ўйинда эмас, аммо мавсум узоқ давом этади ва эртами-кеч, менда шундай имконият бўлади.
- Ўзбекистон ёшлар термаси ҳужумчиси ҳисобланасиз. Жамоа яқин орада Баҳрайнда ўтадиган Осиё чемпионатига тайёргарликни бошлайди. Терма ҳақида нима дея оласиз?
- Таркибдаги футболчилар ўзаро жуда аҳилмиз. Осиё чемпионатида ўз олдимизга қўйилган вазифани бажаришимизга ишонаман. Чунончи, анчадан буён бирга ўйнаб келяпмиз ва ўзаро тушуниб ҳаракатланиш яхши йўлга қўйилган. Жамоамизнинг асосий устунлиги ҳам шу.
- Ёшлар терма жамоаси бош мураббийи Жасур Абдураимов «Пахтакор»дан чиққан. У терма жамоадаги фаолиятида асосий урғуни «пахтакорчилар»га қаратмаяптими?
- Йўқ, Жасур ака ҳаммага бирдек қарайди. Терма жамоада «Пахтакор» ёки «Бунёдкор» қабилидаги тушунча йўқ. Ҳарқалай, ҳеч ким ажратилмайди. Ҳамма бирдек ишлайди ва асосий таркибга кириш учун тенг имкониятга эга. Мураббийимиз ҳам фақатгина ўзини кўрсатган ўйинчи таркибдан жой олишини кўп таъкидлайди. Қолаверса, ёшлар термасида «Пахтакор» ва «Бунёдкор»дан ташқари, яна «Насаф», «Локомотив» ва «Нефтчи» футболчилари бор. Қисқаси, бу борада ҳеч қандай муаммо йўқ.
НУРУЛЛОҲ суҳбатлашди
