Қишки трансферлар вақтида энг кўп давом этган жараён, «ПСЖ» жамоаси ҳужумчиси Эсекиэль Лавессининг Хитой чемпионатига ўтиши бўйича ишлар якунланди.

31 ёшли футболчи фаолиятини Хитойнинг «Хэбэй Чайна Форчун» жамоасида давом эттириши аниқ бўлди. Футболчи хитойликлар билан 2 йиллик шартнома имзолаган.

У янги жамоасида биринчи йилда 13, иккинчи йилда эса 15 млн евро маош олади.

Қайд этиш керакки, Лавессининг парижликлар билан шартномаси жорий йилнинг ёзида якунланиши керак эди. Шу туфайли «ПСЖ» раҳбарияти бу футболчисини 6 млн евро эвазига бўлсада сотишга рози бўлган.

Бундан олдинроқ, «Хэбэй Чайна Форчун» Гаэль Какута («Севилья»), Стефан Мбиа («Табзонспор») ва Жервиньони («Рома») харид қилиб улгурганди.