Пойтахтимизда ўтаётган Осиё чемпионатининг энг катта сенсацияси — Япония терма жамоасининг Жаҳон чемпионати йўлланмасини қўлга кирита олмагани бўлди.

Мигель Родриго шогирдлари чорак финалда Вьетнамга ютқазиб қўйишган бўлса-да, уларда ЖЧнинг бешинчи йўлланмаси учун кураш имконияти сақланиб қолганди. Бу курашда айнан Япониянинг имконияти жуда юқори баҳоланаётганди. Аммо чорак финалдаги мағлубият уларга салбий кўрсатди, шекилли, Қирғизистонга қарши ўтиш баҳсини улар у қадар юқори савияда ўтказа олишмади.

Учрашув бошида японлар голга тортадиган 3та вазият яратишди, аммо Қирғизистон посбони Кирилл Ермолов жамоасини қутқарди. Умуман олганда, Ермолов ўйинни юқори савияда ўтказди. Полховский шогирдлари биринчи бўлимда бурчак тўпидан бир-бирига ўхшаш иккита гол уришга муваффақ бўлди.

Кунчиқар юрт вакиллари иккинчи бўлимни тўлиқ бешинчи ўйинчи тактикасида ўтказишди. Бу тактика орқали жуда кўп вазиятларни юзага келтиришди, аммо улардан фойдаланишда сусткашликка йўл қўйишди. Бу услуб орқали японлар иккита гол уришди, аммо ўз дарвозаларидан 4та гол ўтказиб юборишга ҳам мажбур бўлишди.

Шу тариқа, сўнгги 2та Осиё чемпионатида ғолибликни қўлга киритган Япония бу сафар олтиликка ҳам кира олмади.

Бешинчи йўлланма учун иккинчи ўтиш баҳсида Австралия Ироқни 5:3 ҳисобида мағлуб этди. Эртага Қирғизистон ва Австралия терма жамоалари ЖЧ йўлланмаси учун баҳс ўтказишади.

Футзал бўйича Осиё чемпионати, 5-ўрин учун
ҚИРҒИЗИСТОН - ЯПОНИЯ - 6:2

АВСТРАЛИЯ - ИРОҚ - 5:3