Суарес, Месси ва Неймардан иборат ўта сермаҳсул трио Chаmpionat.com сайтидаги касбдошларимизни изланишга чорлади. Шу тариқа топ-чемпионатлардаги мушкетёрлар рейтинги юзага келди.
7. Агуэро - де Брюйне - Стерлинг - 41та гол (19+12+10)
«Сити»нинг ҳужум чизиғи самарадорлик бўйича Англияда етакчилик қилмоқда. У барча турнирларда ўз ҳисобига 41та голни ёзиб қўйди. Лекин халқаро мусобақалардан четда қолган «Лестер»нинг натижаси (39та) ҳам таҳсинга лойиқ: Варди (19), Маҳрез (15) ва Оказаки (5) учлиги шаҳарликларни изма-из таъқиб этмоқда.
6. Игуаин - Инсинье - Кальехон - 48та гол (26+12+10)
Самарадорлик борасида «Наполи»нинг «Юве»дан, умуман, барча жамоалардан ўзиб кетиши камдан-кам учрайдиган ҳолат. «А» сериясининг жорий мавсумдаги энг яхши тўпурари - Игуаин 26та ўйинда 24та гол урди!
5. Ибрагимович - Кавани - ди Мария - 58та гол (29+16+13)
«ПСЖ» - Франциянинг энг кучли жамоаси, Златан Ибрагимович - энг яхши тўпурар. Жорий мавсумда швециялик ҳужумчи яна бир маррани забт этди - 112та учрашувда 98та гол уриб, «ПСЖ» тарихидаги энг яхши тўпурарга айланди.
3-4. Обемеянг - Мхитарян - Ройс - 66та гол (32+18+16)
Африканинг 2015 йилдаги энг яхши футболчиси жорий мавсумнинг дастлабки 8та учрашувида гол уриб, ўзига хос рекорд ўрнатди. Бундан ташқари, Левандовскига муносиб рақобат кўрсатиш ҳам фақат унинг қўлидан (аниқроғи, оёғидан) келмоқда.
3-4. Левандовски - Мюллер - Роббен - 66та гол (35+25+6)
Мазкур учликда Роббен ўз имкониятидан тўла фойдалана олмади - жароҳат бунга халал берди. Акс ҳолда, «Бавария» янада юқорироқ ўриндан жой оларди.
2. Роналду - Бензема - Бэйл - 73та гол (35+24+14)
Яқинда Роналду бироз манманликка йўл қўйган бўлсада, у ҳақ. Агарда ҳужум чизиғидаги шериклари ҳам у каби самара кўрсатганларида, «Реал» турнир жадвалини бошқараётган бўларди.
1. Суарес - Месси - Неймар - 96та гол (45+29+22)
«Барселона»нинг имкониятлари бошқаларникига кўра сал кўпроқ эди - жамоа клублар ўртасидаги ЖЧда ҳам иштирок этди. Ўша турнирдаги 3та учрашувда Месси билан Суарес ўз голлари сонини 6тага ошириб олишди. Шу тариқа, ажойиб ҳалқа юзага келди: «Барселона» сермаҳсул ўйнаётгани боис турли мусобақаларда иштирок этади, турли мусобақаларда иштирок этаётгани боис юқори сермаҳсулликка эришади!
