Португалия терма жамоасининг собиқ яримҳимоячиси Луиш Фигу 2000 йилнинг ёзида "Барселона"дан "Реал"га ўтгани ҳақида гапирди.
Трансфер ҳақида
"Агентим менга қўнғироқ қилиб, "Реал" президентлигига номзод борлигини ва у менинг товон пулларимни тўламоқчи эканини айтди. Ўшанда бу 60 миллион евро эди - 2000 йилда бу ақлдан озишдек туюларди. Аммо бу шунчаки номзод эди, шартномам бор эди ва бор эътиборимни терма жамоага қаратгандим. Мен агентга уни эшитишни айтдим ва "Барселона" президентига хабар бердим, у эса пулни олиб келишсин, деб жавоб берди. У бу ёлғон деб ўйлади.
"Барселона" мураккаб молиявий вазиятни бошдан кечираётганди ва ўйлашимча, етакчилардан бирини сотмоқчи эди. Мен таътилга чиқдим ва ҳаммаси реал тус ола бошлади.
Мен интервью бериб, кетмайман деб хато қилдим, чунки ўша пайтда ҳақиқатан ҳам қоламан деб ўйлагандим. Бу хато эди. Аммо жараён қор уюми каби кенгая бошлади. Флорентино билан фақат сайловда ғалаба қозонган куни танишдим ва масъулиятни ўз зиммамга олиш учун Лиссабонга йўл олдим. Ва менинг ҳаётим бутунлай ўзгарди".
"Камп Ноу"даги биринчи ўйин ҳақида
"Менинг вазифам ўйинга тайёргарлик кўриш эди. Мен бу трансфернинг рамзий маъносини тушундим, лекин махсус тайёргарлик кўрмадим.
Менга ҳаммасидан ҳам "Барселона" матбуоти шиширган ва вазиятни янада оғирлаштирган кампания ёқмади. Ўшанда бир ёшли қизимнинг сурати туширилган плакатлар бор эди", - деди Фигу.
