Каталониянинг «Барселона» клуби қанот ҳимоячиси Алехандро Бальде жамоасини ўзгартиришга тайёр эмас. Бу ҳақда инсайдер Бен Жейкобс хабар бермоқда.

Журналистнинг маълумотларига кўра, 22 ёшли латералнинг хизматлари «Манчестер Юнайтед»га таклиф қилинган. Бальденинг ўзи эса «қизил иблислар» сафига ўтиш имконияти бўлишига қарамай, «кўк-анорранглилар» сафида тўп суришда давом этмоқчи.

Алехандронинг трансфер қиймати 60 миллион еврога баҳоланмоқда. Ҳимоячининг «Барселона» билан амалдаги шартномаси 2028 йилнинг ёзига қадар мўлжалланган.

Жорий мавсумда Бальде «Барселона» таркибида 32 та учрашувда майдонга тушиб, ўз ҳисобига учта голли узатмани ёздириб қўйди.