«Ливерпуль» жамоаси ҳужумчиси Кристиан Бентеке Англия чемпионатининг 29 турида «Кристал Пэлас»га қарши учрашув (2:1) натижасини ҳал қилган шубҳали пенальти ҳақидаги фикрларини билдириб ўтди.

«Ўша вазиятда рақиб менга тегди ва йиқилдим. Бу шўнғиш эмасди. Ҳакам барчасини яхши кўриб турганди ва тўғри қарор қабул қилди.

Жамоага ҳамиша ёрдам беришга тайёр туриш керак. Мен ўзимга ишондим ва ўйинни ғалабага олиб бориш учун ҳаракат қилдим», – дейди Бентеке.

Эслатиб ўтамиз, ўйинда 1:1 ҳисоби сақланиб турилганида, ўйинга қўшиб берилган дақиқаларнинг охиргиси ўтиб бораётганида Бентеке рақиб жарима майдонига кириб борди ва йиқилиб, пенальти ишлади. Ҳакам томонидан белгиланган 11 метрлик жарима зарбасини унинг ўзи аниқ амалга оширди ва жамоасига ғалаба келтирди.

Бу ғалабадан кейин «Ливерпуль» 44 очко билан 7-ўринни эгаллаб турибди. «Кристал Пэлас» 33 очкоси билан 15-ўринга тушиб кетган.