Куала Лумпур шаҳрида ОФК Ижроқўмининг навбатдаги йиғилиши бўлиб ўтди.

ОФК расмий сайтининг ёзишича, ушбу йиғилишда қитъамиз футбол уюшмасининг узоқ муддатли мақсад ва вазифалари белгилаб олинди. Унга кўра, Осиё Футбол Конфедерацияси бундан кейин ҳам қитъада футбол спорт турнинг янада оммалашиши, аъзо давлатларда “миллионлар ўйини”га бўлган қизиқишни ошириш учун ишлашда давом этади. Йиғилишда тасдиқлангани каби, барча бир мақсад – ОФКни Жаҳондаги етакчи конфедерация бўлиши учун меҳнат қилади.

ОФК раҳбари Шайх Салмон бин Иброҳим Ал Ҳалифа мазкур йиғилишда сўзга чиқди ва қуйидагиларни таъкидлади:

- ОФК бошқа қитъалар конфедерациялари билан ҳамкорлик қилишда давом этади. CAF, CONCACAF, UEFA ва OFC билан турли соҳаларда янада яхши алоқаларни йўлга қўямиз. Биз янада кўпроқ ишлашда давом этишимиз жоиз. Осиё футболи жаҳон майдонига чиқиб бормоқда. Айниқса, жамоаларимизни ҳар жиҳатдан кучайтирмоқ зарур. Шундагина етакчилардан ортда қолишни камайтиришимиз мумкин бўлади. Яқин ой ва йиллар ичида айнан шу соҳада иш олиб борамиз, - дейди ОФК президенти.

Таъкидлаш жоиз, Ижроқўм мажлисида ЎФФ вице-президенти Сардор Раҳматуллаев ҳам иштирок этди.