Машҳур собиқ футболчи Дэвид Бекҳэм компанияси Майамидан ер майдони сотиб олди. Бу ерда Шимолий Америка футбол лигаси (MLS)да иштирок этиши мўлжалланган клуби учун майдон қурилиши режалаштирилган. Бу ҳақда ESPN хабар тарқатган.
Бекҳэм ўз клубига асос солиши ҳақида 2014 йилнинг апрелида маълум қилган. Ўшанда спортчи бу лойиҳага ҳамкорлари билан биргаликда 125 миллион доллар сарфлашга тайёр эканини ҳам билдирган эди.
Аввалига Майами шаҳри ҳокимияти таклиф этилган ҳудудни “номуносиб” деб баҳолаб, қурилишга қарши чиқди. Лекин декабрда футболчи 25 минг кишини сиғдира оладиган арена қурилишига рухсат берувчи ҳужжатни қўлга киритди.
Манбага кўра, Майами-Бич яқинида сотиб олинган майдоннинг кенглиги 2,43 гектардан иборат.
Қурилиш ишлари бошланиш санаси ҳали маълум қилинмаган.
